Zezen Beltz asteburua ospatuko da ostiraletik igandera bitartean

Zapatuan, egun handia izango da Zezen Beltz elkarteko kideentzat. 12:30ean, sokamutur txikia izango da, ohi bezala, Erdi kaletik plazara eta behin bertan, zezen txikiak eta poniak ipiniko dituzte txikitxoen eta gaztetxoen gozamenerako. Arratsaldean, urtetik urtera arrakasta gehiago izaten duen Grand Prix saioa izango da, zezen plazan. Gran Prix solidarioa 17:00etan hasiko da eta Arnasa, Gipuzkoako Fibrosi Kistikoaren elkarteari laguntzeko izango da bildutako dirua. Sarrerak salgai daude. Azpeitian Juantxo-txiki, Olakor, Korrale eta Sanagustinen, eta Azkoitian Elurren. Hiru euro balio du sarrera bakoitzak.

Igandean izango da azken eguna. Eguerdian, bigarrenez, sokamutur txikia egingo da eta ondoren, ohi bezala, zezen txikiak eta poniak ere izango dira. Ordu berean, txahal sahieskia eta oilaskoa dastatzeko aukera izango da plazan. Goizean zehar, Zezen Beltz elkarteko kamisetak eta zapi gorriak erosteko aukera ere izago da.

Arratsaldean, helduentzat tartea egingo da. Helduen entzierroa egingo dute estreinakoz, Artzubitik plazara eta buelta eta honen ostean, zezen bolaztatuekin jolasteko aukera izango da, Artzubia kalean. Honela amaituko da bederatzigarren Zezen Beltz asteburua.

2008an sortu zen Zezen Beltz elkartea. Sokamuturra sustatzea eta lehengo ohiturak berreskuratzea, sokamuturra legez babestea, ganadutegiak bisitatzea, entzierro txikiak antolatzea, kapeak egitea, errekortari txapelketak burutzea, herriko belaunaldiak uztartzea... Horrelako helburuak ditu Zezen Beltz Azpeitiko elkarteak. Zezenketen arloa ez du bere baitan hartzen.

Elkartearen izaera irekia da baina, batik bat, sokamuturrean, ganadutegietan eta entzierrotan ibiltzen diren lagunek osatzen dute. Udalarekin elkarlanean hainbat ekitaldi antolatu ohi ditu Zezen Beltzek. Perez Arregi plazan du egoitza.