Urretxu eta Zumarragako bi mendizalek jaso dute aurtengo Joxe Takolo beka

Udaleko eta Lagun Onak MB-ko ordezkariak, protagonistekin./ E.A.
Udaleko eta Lagun Onak MB-ko ordezkariak, protagonistekin. / E.A.

'Nun da nun?' espedizioa burutu dute udan Xabier Urrate eta Mikel Diezek. Beraientzat dira bekaren 3.000 euroak

ELI AIZPURUAZPEITIA.

Azpeitiko Udalak, Lagun Onak Mendi Bazkunak eta Gipuzkoako Mendi Federazioak eskaintzen dute Joxe Takolo beka 2001etik goi mailako mendiko egitasmoak bultzatzeko. Urtez urte gero eta proiektu gutxiago aurkezten joan dira ordea eta iazkoa «inflexio puntua» izan zen.

Hala, Lagun Onak Mendi Bazkunak zuen eta Udalak elkarbanatzen zuen kezka bati heldu eta bekaren inguruko azterketa egiteko bideratu zen iazko beka. Mendizaletasunaren bilakaera aztertu, eta Joxe Takolo beka eguneratu du Lagun Onak MB-k. Beraz, lanketa hori medio, «zertxobait atzeratu da erabakia», azaldu zuten ostegunean Estitxu Elduaien, Udaleko kirol batzordeburuak eta Aitor Unanue, Lagun Onak MB-ko presidenteak eta epaimahaiko kideak. Uda aurretik eman ohi da Joxe Takolo beka, eta onuradunek espedizioaren berri eman izan dute aurrez orain arte. Aurtengoan, aipatutako arrazoiengatik, ondoren egin da, beka zabalduta egon arren. Beraz, aurtengo irabazleek, espediziotik bueltan izan dute laguntzaren berri.

Honela, Xabier Urrate eta Mikel Diez, Urretxu eta Zumarragako mendizaleek, Nun menditik bueltan jaso dituzte Joxe Takoloren izenean emandako 3.000 euroak. «Sorpresa eta ohore handia», izan dela adierazi zuten herenegun udaletxean egindako ekitaldian. «Sorpresa ez bakarrik diru laguntzagatik baizik eta Joxe Takolo bekak duen sonagatik», adierazi zuten.

42 minutuko ikusentzunezkoa prestatu dute 'Nun da nun?' espedizioaren inguruan eta Azpeitiko Mendi Astean ikusi ahal izango da. Protagonistek xehetasun guztiekin azaldu zuten proiektua. «Zazpi millako tontor ezezaguna da Nun mendia, hortik proiektuaren izenburua. Cachemirako lurraldean dago, eta India eta Pakistanen arteko liskarrak medio, abentura handia suposatu digu», azaldu dute protagonistek.

Guztira lau proiektu aurkeztu dira aurten Joxe Takolo bekara eta aukeratuak «Joxe Takolo zenaren filosofiarekin guztiz bat egiten du. Alpinismo klasikoa da eta horretaz aparte, bekak eskatzen dituen baldintzak bete-betean jorratzen ditu», azaldu zuen Aitor Unanuek. Joxe Takoloren familiakoei ere «agur bat eta animoak» bidali zizkieten. «Urtero hemen izan ohi dira baina unegogorrak bizi dituzte eta ezin dute gaur gurekin egon».

Contenido Patrocinado

Fotos

Vídeos