Trikigiro jaialdia egingo dute gaur bailarako trikitilariek

Ehundik gora lagunek hartu zuten parte iaz. /  E.A.
Ehundik gora lagunek hartu zuten parte iaz. / E.A.

19:00etan hasiko da, Sanagustinen. Kalejira egingo dute 20:00etan, eta kulturgunean bertan afaria izango dute ondoren

AZPEITIA.

«Trikitiaren transmisioari bultzada emateko asmoz», III. Trikigiro jaialdia izango da gaur Azpeitian, Sanagustin kulturguneak eta Trikigiro elkarteak antolatuta. Bailarako hainbat trikitilarik hartuko dute parte. Sanagustin kulturgunean elkartuko dira trikitilariak, 19:00etan, eta musikari gaztetxoenek saioa eskainiko dute. Ondoren, 20:00etan, kalejira egingo dute eta herria zeharkatu ondoren, 21:00etan, Sanagustin kulturgunean afalduko dute. Afalostean erromeria egingo dute, 23:00etan. Honako trikitilariek parte hartuko dute: Tolosa ahizpak, Eneko Arbeo eta Imanol Antxitte; Lanberri eta lagunak; Gugaz erromeria; Xabier Etxaniz, Julen Alonso, Eneritz Aulestia eta Esti Markez; Landa anaiak eta Attola anaiak; Itzeder, Txibilter, Garixe, Montte eta Maltzeta; Naiara Mantzizidor, Oleaga ahizpak eta Jurgi Ituarte; eta Aritz Alustiza, Lierni Aranburu, Maitane Arteaga, Manex Torrealdai eta Ane Arenaza. Edonor joan daiteke afaltzera, eta erreserba Sanagustin kulturgunean edo 943-10 52 20 telefonora deituta egin behar da, hamabost euroren truke.

Gaurko jaialdia beste hainbat ekitaldiren hasiera besterik ez da izango. Aurrera begira, hitzaldi zikloa, argazki erakusketa eta ikuskizun berezi bat prestatu dituzte Trikigiro Kultur Elkarteko kideek, KUlturaz Kooperatibarekin elkarlanean eta Udalaren laguntzarekin.

Fotos

Vídeos