21 postu izango dira zapatuan Sanjuandegiko Azoka Herritik egitasmoan

DV AZPEITIA. Viernes, 15 diciembre 2017, 00:26

«Txikitik eragitea da gure xedea, tokiko sorkuntza eta ekoizpenari bide eman, zentzuzko kontsumoa bultzatu, kaleetako bizitza soziala indartu eta auzolanaren zein elkarlanaren bidez herri justu eta bizi bat lantzea», honela azaldu dute antolatzaileek, etzi, zapatuan ospatuko den Azoka Herritik ekimenean dituzten asmoak azaltzeko. Urteroko hitzordua prestatu dute XJ Auzolanean taldeak eta Azoka Herritik egitasmoan biltzen diren herriko talde eta sektore ekonomiko ezberdinek, Udalaren laguntzarekin.

Berrikuntzak ere txertatu dituzte edizio berri honetan. Izan ere, Elikaguneko lagunak izango dira bertan. Kooperatiba moduan antolatu eta tokiko produktuak Azoka Plaza ereaberrituan urte osoan zehar eskainiko dituen dendak laster ikusiko du argia, eta proiektu hori azalduko dute sustatzaileek azokan. Horretaz gain, beraiek prestatutako pintxoak dastatzeko aukera ere izango da.

Baserritarrek -bertako eta garaiko barazkiak, gaztak, ogiak... eskainiko dituzte-, artisauek -arropak, txotxongiloak, karterak, belarritakoak, lepokoak... salduko dituzte-, herriko kooperazio taldeek beren proiektuak ezagutzera emango dituzte, Elkar-ekinek bigarren eskuko azoka jarriko du -liburuak, arropa, sukaldeko tresnak, altzariak eta antzeko produktuak... eskuratu ahal izango dira. 21 postu izango dira guztira.

10:00etatik 14:00etara bitarteko iraupena izango du azokak.