Martxan da jolas parke berria Azpeitiko Ikastola Ikasberrin

Kimu proiektu pedagogikoaren baitan osatu da parkea eta bereziki 0 eta 6 urte bitarteko haurren garapenera egokitutako jolas parkea izango da. Hala ere, Leire Goenaga Hezkuntza zinegotziak azaldu duenez «astegunetan eta eskola orduan Ikasberriko haurrek erabiltzea adostua badugu ere, beste ikastetxeetako jolas parkeak bezala, eskola orduz kanpo herritar orok erabiltzeko aukera izango du».

Esperimentazioa, esplorazioa eta jolasa dira haurraren ikaskuntza prozesuaren oinarri eta bitarteko. «Haurrak bere gorputzetik abiatuz ingurunearen ezagutzeari ekiten dio adin honetan», adierazi du Arantxa Bidezabal Ikastolako zuzendariak.

Honela, «haurrei beren garapenean laguntzen dieten zenbait elementu barneratzen ditu eta esploratu ahal izateko ingurune natural anitzak eskaintzen dizkie jolastokiak», azaldu du eskertuta, Ikastolako arduradunak.