Iñaki Aiertza: «Ez nuen sekula pentsatuko Urrakiko Igoera irabaziko nuenik»

Iñaki Aiertza bere autoarekin (Mitsubishi EVO IX) eta Urrakin jantzitako txapela eta trofeoarekin./E.A.
Iñaki Aiertza bere autoarekin (Mitsubishi EVO IX) eta Urrakin jantzitako txapela eta trofeoarekin. / E.A.
Iñaki Aiertza, auto gidaria

XXXV. Urrakiko Igoera irabazi zuen igandean Joseba Iraola eta Antonio Fombonaren aurretik

ELI AIZPURUAZPEITIA.

Guztia «borobil» atera zitzaion igandean Iñaki Aiertza pilotu azpeitiarrari Urrakiko XXXV. Igoeran. Autoa euritarako prestatuta zuen eta euria egin ere; eta gutxi balitz, Estatu mailan lehiatzen diren pilotu onenen aurretik sailka-tzea lortu zuen, txapela jantziz. Baina igandekoa bakarrik ez, urtea ere borobila doakio Aiertzari. Aita izan berria -sei asteko haurra du- kotxeekiko txikitatik duen afizioa muturreraino eraman du eta 35 urterekin 35.a izan den Euskal Herriko proba garrantzitsuenetakoaren historian sartu da. Txapela ken-tzekoa. Oraindik «lainoetatik jaitsi gabe» eta inguruko denak zorion-tzera datozen bitartean, hitz egin dugu berarekin.

-Lehen azpeitiarra Urraki irabazten. Ikaragarria, ezta? Zer nolako sentsazioak sorrarazi dizkizu horrek?

-Poza, sorpresa, satisfakzioa ikaragarria da. Lehenengo manga eta gero ikusi nuen aukera izatea nuela. Azkenean, lan asko egin dugu kotxe honetan, prestaketetan, eta oraindik geratzen zaigu baina konpetsazio handia da hau. Ez nuen sekula pentsatuko Urraki irabaztea. Agian, burutik pasa izan zait barketaren bat alokatu eta harekin irtetzeko kapritxoa betetzea baina kotxe batekin ez. Gainera, geuk (aitak, anaiak eta biok) prestatu dugu autoa eta are eta satisfakzio handiagoa da.

-Nola joan zen lasterketa?

-Proba hasiera-hasieratik euriak baldintzatu zuen. Entrenamenduetako mangan lurra oso-oso labainkorra zegoen. Hortaz aparte, hotza, euria... Añotako errebueltatik aurerra kotxe batek olioa galdu zuen eta izotzezko pista bat bezala zegoen. Entrenamenduetako mangan susto bat izan nuen gainera. Zortez, ezer ez nuen jo eta ondo. Euritako gurpilak aldatu nituen eta kotxea askoz hobeto joan zen. Lehen mangan ere aurreneko postua egin nuen baina gertuago nituen, hiru segundu edo. Bigarren mangan euria geratu zuen eta hor jaitsiko nintzela pentsatu nuen baina nik uste baino gehiago hobetu nuen neuk eta besteek, aldiz, ez. Hiru segundoko aldea besterik ez nuen atera baina ondo, oso gustura.

-Igoera behintzat oso ezaguna duzu.

-Etxeko pasilloa bezala ezagutzen dut Urraki. Lehen Tolosara ere asko joaten ginen, beraz, txiki-txikitatik asko ibili naiz hor. Entrenamenduetan, berriz, hiru edo lau aldiz igo nuen eta bakarra euritan.

-Anaia, Jokin, eta biok ibiltzen zarete kotxe berarekin. Aholkurik eman al zizun irten baino lehen?

-Nik neuk estreinako aldia nuen proba batean euriarekin ateratzen eta anaia ibilia zegoen. Berak bost lasterketa egin ditu eta denak euritan. Nik, berriz, lau eta bat bera ere ez eguraldi txarrarekin. Berak gehiago ezagutzen zuen kotxea alde horretatik eta nola jokatu eta zer egin esan zidan. Kotxea oso-oso ondo joaten da euritan, esan beharra dago. Askoz kotxe hobeak dituzte Iraolak edo Fombonak baina euritan, hau ondo joaten da.

«Amak gaziki darama bi semeak kotxe berean lehiatzea eta ez gara elkarrekin ateratzen»

-Eta etxean, gurasoak-eta joan al ziren ikustera?

-Aita hitz jario gutxikoa da baina oso gustura dago. Amak bukatutakoan lasaitu ederra hartzen du. Anaiaren pilotu-lagun ere ateratzen naiz baina aurten laga egin diogu, amak oso gaizki pasatzen zuen-eta, bi semeak kotxe berean, badakizu. Beste azpeitiar bat, Joseba Bikendi, izan ohi dugu orain biok kopilotu bezala (Urraki bakarrik gidatzen da), eta honela ama ere lasaiago dago.

-Jende askok zoriondu al zaitu?

-Harrituta nago. Mezuak, deiak... jaso ditut, bai herritarrenak eta baita Euskal Herri osotik egindakoak ere. Mobila bloketatuta izan dut. Harrituta nago horrekin.

-Aurrera begira, zer asmo dituzue?

-Bi anaiak txandaka ibili ohi dugu autoa. Probak aukeratu ditugu eta biok oso denboraldi ona egin dugu. Gauza negatibo bakarra Azpeitian bertan, Rallysprintean izan genuen. Istripua izan genuen. Bestela, denak bukatu ditugu eta Jokinek ere Aian irabazi egin zuen kotxetan eta orokorrean hirugarren egin zuen.

-Bien arteko pikerik ba al dago?

-Ez. Oso ondo konpontzen gara. Antzeko maila daukagu eta azkenean, nik ikasitakoa berari erakusten diot eta bera ere trebea da-eta, asko laguntzen nau.

-Norbait eskertu nahi al duzu?

-Eskerrak babesleei hau posible egiteagatik eta etxekoei, bereziki, alboan egoteagatik.

Más

Fotos

Vídeos