Eman daiteke izena Azpeitia-Bilbo 2018 egitasmoko laugarren etapan

Jende ugarik hartu du parte aurreko Azpeitia-Bilbo egitasmoko etapetan. /  LAGUN ONAK M.B.
Jende ugarik hartu du parte aurreko Azpeitia-Bilbo egitasmoko etapetan. / LAGUN ONAK M.B.

Parte hartu nahi dutenek hilaren 12a, datorren osteguna, baino lehen eman beharko dute izenaHilaren 14an, larunbatean, egingo dute ibilbidea, Elantxobetik Bermeora artekoa

ELI AIZPURU AZPEITIA.

Lagun Onak Mendi Bazkunak antolatutako Azpeitia-Bilbo 2018 egitasmoko laugarren etapa burutuko dute hilaren 14an eta dagoeneko izena emateko aukera ipini dute antolatzaileek. Elantxobetik Bermeora arteko ibilbidea egingo dute laugarren irteera honetan, eta bertan parte hartu nahi dutenek hilaren 12a baino lehen eman beharko dute izena.

Honakoa izango da hurrengo irteerarako egitaraua: anbulatorio aurretik autobusez irtengo dira Elantxobera, 8:00etan. Bertan hasiko dituzte eguneko pausoak eta Ogoño ondotik Lagako hondartzara iritsiko dira. Handik Akorda auzora igoko dira, eta ondoren, San Pedro Atxarreko baselizara joango dira, Laidako hondartzara jaisteko.

Txalupaz Sukarrietara joango dira, eta Mundakatik pasatuta, Bermeora iritsiko dira. Lagun Onak MBren aurreikuspenen arabera, parte-har-tzaileak 16:00-16:30ak aldean iritsiko dira Elantxobera.

Ibilbidean zehar bi geldialdi egingo dituztela aurreratu dute antola-tzaileek. Aurrena 15 minutukoa izango da, hamaiketakoa egiteko. Bigarrena, berriz, 30 minutukoa, bazkaltzeko. Norberak eraman beharko du jatekoa.

Azpeitia-Bilbo 2018 egitasmoaren laugarren etaparako izena www.lagunonakmb.org webgunean edo Xiriako gozotegian eman daiteke, hilaren 12a bitartean. Mendi bazkunako bazkideek 8 euro ordaindu beharko dute izen-ematea, eta bazkide ez direnek, berriz, 10.

Joan zen urtarrilean jarri zuen martxan Azpeitia-Bilbo 2018 egitasmoa Lagun Onak mendi bazkunak. Guztira, zortzi etapa antolatu dituzte, denak 20-25 kilometro artekoak dira, eta GR eta PR izeneko ibilbideetan zehar egingo dituzte. Dagoeneko hiru ibilaldi osatu dituzte: Azpeitia eta Deba artekoa (1. etapa) eta Debatik Lekeitiora artekoa (2. etapa) eta Lekeitiotik Elantxobera artekoa (3. etapa).

Contenido Patrocinado

Fotos

Vídeos