«Detaile oso txikitan» erabakiko da biharko urrezko aizkorako finala

Saralegi, Txikia IV.-a eta Atutxa II, antolatzaile eta udal arduradunekin. / E.A.
Saralegi, Txikia IV.-a eta Atutxa II, antolatzaile eta udal arduradunekin. / E.A.

Binakako Urrezko aizkolarien finala jokatuko da bihar Izarraitz frontoian, 12:00etatik aurrera eta lehia «parekatua eta estua» aurreikusten da

ELI AIZPURU AZPEITIA.

Urrezko Binakako Aizkolarien finala hartuko du Azpeitiak bihar. Izarraitz frontoian izango da, 12:00etan. Sarrerak lehiatilan eskuratu ahal izango dira eta 25 euro balioko dute. Atzo, ostirala, elkartu ziren antolatzaileak eta udaleko arduradunak final handiko protagonistetako hiru aizkolarirekin, ekitaldiaren berri emateko eta era berean «jendea horrelako ikuskizun batean parte hartzera gonbidatzeko». Luis Mari Bengoa antolatzaileetako bat eta udaleko arduradun Estitxu Elduaien eta Mikel Ibarzabal izan ziren bertan. Alboan, Aitzol Atutxa, iazko eta azken lau urtetako txapelduna (orain arte Ugaitz Mugertzarekin aritu izan da bikote baina Julen Alberdi izango du aurten alboan); Julen Alberdi 'Txikia IV.a ere bertan zen eta Ruben Saralegi izan zen ekitaldian esertzen hurrena. Honela, Atutxa II.ak Txikia IV.a izango du, beraz, alboan; Ruben Saralegik eta Iker Vicentek osatuko dute beste bikotea eta Ugaitz Mugertzak Joseba Otaegi izango du bidelagun.

Hiru aizkolariak bat etorri ziren atzo eta finala «estua» izango dela esan zuten. Ruben Saralegiren esanetan, «oso parekatua» izango da. Aurten bereziki, «diferentzia gutxi» dagoela aizkolarien artean esan zuen gazte nafarrak eta «detaile oso txikitan» erabakiko dela lehia. «Segundu gutxiko aldea izango da», amaitu zuen.

Estreinakoz halako lehia batean izango da Julen Alberdi azkoitiarra, 'Txikia IV.arentzat, ere «oso estua» izango da» edozein faktore edo akatsek erabaki dezake finala».

Alboan, Atutxa handia izango du azkoitiarrak. Txapeldunaerentzat «ez da kasualidadea» iazko finaleko sei aizkolaritik 5 biharko zitan egotearena. «Azken lau urtetan nahiko hegemonikoa izan bada txapela, aurreko saioetan ikusi da azken momentura arte ez dagoela ezer erabakita», esan zuen Dimakoak.

Emakumeak ere bai

Urrezko aizkolarien binakako txapelaz gain, banakako urrezko emakume aizkolariak ere izango dira lehian jaialdi berean. Lau emakume lehiatu dira txapelketan eta laurak izango dira finalean. Irune Azkue, Maika Ariztegi, Nerea Sorondo eta Irati Astondoa.

Harrijasotzaileak

Bestalde harrijasotzaileen txapelketa ere izango da, harri handiekin. Bertan izango dira Aimar Galarraga, Imanol Illaramendi 'Kortaberri' eta Xabier Aranburu 'Guzta' harrijasotzaileak.

Contenido Patrocinado

Fotos

Vídeos