Danborradak badu kantera!

Piratak ere Azpeitiko danborradan./
Piratak ere Azpeitiko danborradan.

Danbor hotsa nagusitu zen egun guztian , gero gauean, helduen festa handiari testigua pasatzeko Herriko ikastetxe desberdinetako ikasleek danbor festa izan zuten atzo arratsaldean

ELI AIZPURUAZPEITIA.

Ospakizuna denean, orokorrean partaidetza handia izan ohi da Azpeitian. Hala ere, sansebastianetan gauden honetan, hau da, dudarik gabe, herriko ospakizunik jendetsuena. Atzo gaueko helduen danborrada eta gaur egingo den txikiena kontuan hartuta, ia 2.000 lagunek hartuko dute parte. Hori, kalean, danborra jotzen. Horren atzetik jende asko eta inplikazio ugari dago, jostunak, danbor egileak eta abar eta abar luze bat.

Parte-hartzearena alde batera lagata, adin guztietakoen festak ere badira sansebastianak. Danborradan bertan, gazteenetik hasi eta heldueneraino adin desberdineko herritarrak ikus daitezke. Horri gaur ospatuko den umeen danborradako haurrak gehituz gero, behera goaz adinean. Are eta gehiago, ikastetxeetan ospatu diren danborrada desberdinetako ikasleekin, esan daiteke bi urtetik laurogei edo gehiagora arteko azpeitiarrak batzen dituela festa honek. Futbolean lehen mailara heldu nahi duten gaztetxoen gisa, Azpeitian, urtero lan egin ohi dute txikitxoak Danborrada 'haundira' heltzerako bidea ondo egina izateko. Ibilbide horretan gazte gaztetandik danborraz gain, kantinera, banderadun edo zuzendari lanetan trebeak direnak ere badira.

Danborradak, dudarik gabe, badu kantera Azpeitian! Garbi geratu zen atzo. Karmelo Etxegarai Azpeitiko Ikastolako, Iraurgi Ikastetxeko eta Azpeitiko Ikastola Ikasberriko ikasleek erakustaldi bikaina eman zuten, bakoitzak bere egoitzan. San Sebastian jai berezi honetako doinuak ondo baino hobeto barneratuta dituztela garbi laga zuten.

Ardozaleak eta Gure Ametsa taldeek danbor hotsekin esnatu dituzte gaur herritarrakEguerdian, txikitxoak izango dira protagonista berriro, haurren danborradanAsteburua izanik, ohiko sei talde beharrean, hamabi izango dira guztira, gaur, arriadan

Horietatik asko eta asko gaur ere protagonista izango dira. Izan ere, haurren danborradan hartuko dute parte. Zenbait logurarekin esnatuko zen gaur, atzo 'parrandan' gurasoekin Danborrada ikustera irten zelako.

Dena dela, gaur berriro ere danborra edo barrikak hartu, dotore, bakoitzak bere taldeari dagokion uniformea jantzi, kasu batzuetan ile-apaindegira ere joango dira, baina 12:30erako prest izango dira denak, berriro ere festan parte hartzeko.

Berriro danborrek hartuko dute protagonismoa goiz goizetik. 9:00etarako, txistularien eta Musika Eskolakoen goiz eresiak esnatuko ditu azpeitiarrak. Ondoren, 9:30erako hasiko dira danbor hotsak kalean. Azpeitiko beste Danborrada da hau, goizekoa. Ardozaleak eta Gure Ametsa taldeek, Udal Musika Bandarekin eta Musika Eskolako txilibituekin batera kalejira egingo dute. 10:15erako, kaleak alaitu ostean, udaletxe aurrera iritsiko dira. Bertan izan ohi baitira zain herriko agintariak Sebastian Donearen parrokiarantz abiatzeko. Behin han, prozesioan aterako dute santua (eguraldiak laguntzen badu behintzat).

Alde Zaharreko kaleak zeharkatu ostean, berriro Parrokira iritsiko dira prozesioan parte hartutako udal arduradunak, Musika Banda eta danbor jotzaile taldeak. Olazko Amari Mezari ekin baino lehen, Parrokiko eta Julian Barrenetxea abesbatzekin batera, azpeitiarrentzat egungo une hunkigarrienetakoa bihurtu den momentua izango da, Ardozaleak eta Gure Ametsakoek eliza barruan jo ohi duten San Sebastian Martxa.

Ordurako eguneko protagonista txikiak urduri izango dira danborradari hasiera emateko. 12:30ean izango da hori baina aurretik beste askok, zezena izango dute buruan. Zita garrantzitsua hau ere sansebastianetan. Urteko lehen sokamuturra izango da Plaza Nagusian, Arno ganadutegiko zezenekin. San Sebastian Eguneko zezenaren zain izan ohi dira sokamutur zaleak eta oraingoan are bereziagoa da zita. 500 urte dira aurten Azpeitian sokako zezena dagoenetik eta data esanguratsua ospatzeko sokamuturrak ere duena baino protagonismo handiagoa hartuko du herrian, Karnabalak bitartean.

Gatozen danborradara. 12:30ean irtengo dira Aranetik eta Artzubitik haurren danborradan parte hartuko duten hamar taldeak. Atzetik, orain arteko sekretupean izan den karroza ezagutzeko aukera izango dute herritarrek. Nola ez, bost mende bete dituzten sokamuturraren omenez. Nekane Azpiazu Lejardi herritarrak egin du.

Behin goizeko ekitaldiak amaituta, atsedenerako tartea izango dute txikitxoak, emozioak baretzeko.

Arratsaldean jarraituko du festak. 16:00etatik aurrera, haur parkea izango da Olazko Amaren plazan. Euria badago, Betharrametako frontoian egokituko dira jolasak.

16:30ean, sokamuturra izango da, berriro ere Arno ganadutegiko zezenekin.

Ez da ez danbor hotsa geratuko. 23:15erako bandera jaitsieran aurten parte hartuko duten 12 taldek -sei izan ohi dira urtero, beraz, kopurua bikoiztuko da aurten- pasiara hasiko dute, kaleak zeharkatu ostean, 00:00etan arriadarako plazara iristeko.

24 orduko danbor hotsa izango da. Behin bandera jaitsi eta gero, Ilargi beltza (Plazan) eta DJ kanutoren (Sanagustinen) kontzertuek hartuko dute erreleboa.

Bihar, igandea, zezen festak jarraituko du. Goizean (12:00),sokako zezen txikia izango da Erdikalean, Bergarako zezenekin. Arratsaldean (16:30) sokamuturra dago berriro, Lopene ganadutegiko zezenekin.

Contenido Patrocinado

Fotos

Vídeos