«Baloreen trukea» eta «hartuemana» indartu nahi dituen Azoka, abian

Azoka Herritik ekimenean parte hartuko duten eragile desberdinak, aurkezpenean./
Azoka Herritik ekimenean parte hartuko duten eragile desberdinak, aurkezpenean.

Bihar eta asteburuan Azoka Herritik ekimenak hartuko du Azpeitia hainbat eragileren eskutik. 'Baloreen azoka' hitzaldiarekin hasiko da bihar eta asteburuko hiru egunetan, bigarren eskuko azoka, kirola edo kontzertuak izango dira

ELI AIZPURUAZPEITIA.

Bosgarren urtez jarraian, Azoka Herritik ekimena antolatu dute herriko hainbat eragilek. Bihartik igandera bitartean burutuko da eta izango da zer ikusia bertan. Izan ere, antolatzaileek aurreratu duten bezala, «herritik eta herriarentzat» egindako ekimena da Azoka Herritik. «Ez da besteak bezalako azoka Bat», diote. Produktuen salerosketa baino «baloreen trukea eta hartuemanerako lekua» dela esan dute. Jendeari «bestela bizitzeko» aukera eman nahi dion azoka da baina ez ohikora itzuli eta salbuespen gisa ikusteko, «elkarrekin egiten garela ikusteko» baizik.

«Biharko gizartearen oinarri» bihurtu nahi du Azoka Herritik ekimenak. Hori dela eta, bihartik hasi eta asteburuan zehar, hainbat eragilek elkar hartu, eta ekimen ugari antolatu dituzte. Hasteko, bihar arratsaldean, 19:00etan hasita, 'Baloreen azoka' hitzaldia eskainiko da Sanagustin kulturgunean.

Azoka Herritik ekimenak asteburuan jarraituko du gero, ostiraletik igandera bitartean.

Ostiral arratsaldean, baserritarren azoka edota 'Plazatarrak' egitasmoa burutuko dira estreinako, plazan. Gero, Gaztetxean jarraituko du, afaria eta tratu onen inguruko foroarekin.

Zapatuan, egun osoan zehar hartuko du Azpeitia Azoka Herritik ekimenak. Goizean, baserritarrak, artisauak, bigarren eskuko azoka, kooperazio taldeak, Oinatz elkarte animalistak, Bertan Merkataritza elkarteak, Extremadurakoak, Arte eta Diseinu eskolak, Musika Eskolak edota Antxieta Arkeologia taldeak beren postuak ipiniko dituzte, erosketak edota harremanak sendotzeko, eta herritarrek eragile desberdinek urtean zehar egiten duten lanaren berri izateko ere balioko du, besteak beste.

Annapurna II crowdfounding kanpaina ere aurkeztuko dute azokaren barruan. 1986ak Azpeitiko zortzi mendizalek Annapurnara egindako espedizioaren dokumentala berreskuratu eta osatu dute herriko hainbat eragilek, eta, duela 31 urte bezala, herritarren laguntza eta babesa jasotzeko kanpaina abiatuko dute hilaren 14an.

Bestalde, Argazki Elkarteak Azokarekin bat egin eta aurten jarriko duen estudioa orduko espedizioari buruzkoa izango da.

Azoka Herritik bosgarren edizioari amaiera emateko, igandean 'Mateo Txistu' filma eskainiko da, Soreasu antzokian.

Fotos

Vídeos