Azpeitia eta Bilbo lotuko ditu oinez Lagun Onak Mendi Bazkunak

Zortzi etapetan osatuko dute ibilaldia eta lehena hilaren 13an izango da, Azpeititik Debara; jada eman daiteke izena

E.A.AZPEITIA.

Lagun Onak Mendi Bazkunako kideek egitasmo berri bat ipiniko dute abian hilaren 13tik aurrera. Iaz Azpeitia eta Hazparne bitarteko ibilaldia burutu zuten eta aurtengoan Bilboraino oinez iristea izango da helburua.

Zortzi etapa prestatu dituzte eta lehendabizikoa, Azpeitia-Deba, hilaren 13an, izango da. «08:00etan herriko plazatik Xoxote aldera abiatu eta, Alabier inguruan Izarraizko Itzuliko GR-arekin bat eginda, Aittolaraino iritsiko gara hari jarraituta. Handik Itziarrera joan eta, amaitzeko, Santiago bideari jarraituz iritsiko gara Debaraino», adierazi dute Lagun Onaketik.

Azpeitira ala Bilbora, aukeran

Bidean 15 minutuko geldialdia egingo da hamaiketakoa egiteko, eta beste 30 minutukoa, berriz, bazkaltzeko; bakoitzak bere jatekoa eraman beharko du.

Hilaren 13ko estreinako etapan parte hartu nahi dutenek dagoeneko eman dezakete izena, Lagun Onak M.Bren webgunean edo elkartearen tabernan, urtarrilaren 11rako.

Ibilaldiaren egunean presoen eskubideen aldeko manifestazioa egingo da Bilbon. Hori dela eta, Deban bi autobus izango dituzte aukeran ibilaldian parte hartuko dutenek, bat Azpeitira itzultzeko eta bestea Bilbora joateko. Izena ematerakoan zehaztuko beharko dute mendizaleek zer autobus erabiliko duten, eta horren arabera aldatu egingo da, era berean, izen-ematearen prezioa.

Horrela, Azpeitira itzultzeko asmoa dutenek, hiru euro ordaindu behar dituzte izena ematerakoan bazkide badira, eta lau euro bazkide ez badira; Bilbora joateko, berriz, bazkideek sei euro eta bazkide ez direnek zortzi euro ordaindu beharko dituzte.

Contenido Patrocinado

Fotos

Vídeos