Amaia Zabala eta Maite Larrañaga): «Ajerako onena neurriz edatea da, ez dago miraririk»

Amaia Zabala eta Maite Larrañaga./A.S.
Amaia Zabala eta Maite Larrañaga. / A.S.

ALEX SILVAAZPEITIA.

Udan gehiegikeri asko egiten ditugu. Jaiak direla eta alkohol ugari edaten dugu, oporraldian herrialde desberdinak bisitatzean denetarik eta kopuru handian jateko joera izaten dugu, baita hondartza edota eguzkipean luzaro jarduteko. Ondoren, abuztua pasatuta, gure gorputzak ondorioak jasan behar izaten ditu kasu askotan. Farmazabal parafarmaziko Amaia Zabala eta Maite Larrañagak garbi dute ez dagoela mirarik, gauzak neurrian egitea dela gure gorputza osasuntsu mantentzeko modua.

-Festaz festa ongi pasatzen dugu, ondorengo egunean etortzen da ajea.

-Beno, ez dut uste ezer berririk esango dudanik horren inguruan. Denok dakigu ajea ez izateko, edota eramangarria izateko parrandan kontrolatu behar garela. Egia da ur asko edateak eta jan arinak hartzeak lagundu egiten gaituela, izan ere alkoholak asko deshidratatzen gaitu eta estomagoa ere ez digu bere onenean lagatzen. Aipatu behar dut buruko minetarako ez dela gomendagarria parazetamola hartzea, gibela lanpetuta dugunean farmako horrek ez dio onik egiten eta.

-Beraz, ajea pasatu egin behar, ez?

-Atera aurretik bai egin ditzazkegula gauzak. Ongi jatea eta ur asko edanda izateak beti lagunduko digu alkohola metabolizatzerakoan. Ondoren, ura eta lo egitea, besterik ez.

-Alkohola izaten da nagusi, baina janaria ere barra-barra jartzen dugu mahaian udan.

-Hor ez dago profesionalen barita magikorik. Gauzak neurriz egin behar dira, ez besterik. Digestibo pila daude merkatuan, baita sabeleko egonezak lasaitzekoak, baina jaterakoan kontrolatzen bagara, ez ditugu behar izango.

-Dena ez dago, ordea, gure esku. Udak berak ere baditu gauzak: eguzkia, hondartza, txankletak...

-Haurrak eta jende heldua oso ondo zaindu behar ditugu. Kalean denbora asko pasatzen dute eta deshidratazio asko ematen dira. Jantzi arropa arinekin, edan ura sarri eta jan urtsuak diren elikagaiak (frutak, barazkiak...) gorputzaren ur kopurua eta tenperatura mantentzeko. Betidanik egin izan diren gauzak dira hoberenak: kotoizko arropak, kolore argiak, itzaletan egon.

-Eguzkitako kremak ere mundu bat dira, mito asko daude horren inguruan?

-Kremaren sekretu nagusia gustukoa izatea. Hori da garrantzitsuena, izan ere gustuko lekuan aldaparik ez esaten dute. Kasu honetan ere berdina gertatzen da. Krema gustukoa badugu, ez dugu arazorik askotan errepikatzeko aplikazioa, edota eskuzabaltasunez emateko gorputzean. Kalera atera orduko erradiazioak gure gorputzean jotzen du, nahiz eta jantzita egon. Bi ordu eta bi ordu eta erdi bitartean ematea garrantzitsua da, baita hondartzara joan aurretik eta, noski, eguzkiaren puntako orduak ekidin. Kremetan sekulako barietatea dago. Bakoitzak gustukoa duena erosi dezala.

-Urte batetik besterako krema bai?

-Hondartzara bueltaka ibili badugu ez. Krema uda baten bukaeran erosi eta etxean izan badugu potea datorren udarara arte, erabili dezakegu uda hasieran, baina tenperatura aldaketa asko izan baditu, ziurrenik ez gaitu behar bezala babestuko. Dena den, ez dugu gomendatzen aurpegirako erabiltzea.

-Eta oinetan? Txankletak?

-Oinak mimatu egin behar dira. Etxera iristerakoan ongi garbitu, sekatu, krema on bat erabili. Ez dago arazorik txankletak erabiltzeagatik, baina erabilera mugatu behar dugu. Zuekoen kasuan ere, gomazkoak eta zuloz betetakoak egokiak dira lanerako adibidez. Oinak agindu behar digu. Batzuek larrua bakarrik eskatuko digute, beste kasuetan errazago moldatuko gara. Baina gogoan izan oin lehor batzuekin hasi eta erroitzekin eta bestelako arazoekin amaitu dezakegula.

Fotos

Vídeos