Diario Vasco

Baserri bideak egin eta mantentzeko «indar berezia» egingo du Udalak

Udalak landa eremuko baserrietarako bideak hobetzeko diru-poltsa jarri ohi du. Hala izan da 2016an ere. 200.000 eurotik gorako inbertsioa egin du baserri bideak egin edo konpontzeko. Aurrekontuetan 75.000 euroko diru-poltsa jarri bazen ere, baserrietarako hainbat bide egokitzeko eta bideetako segurtasuna bermatzeko beharra zegoela ikusita, esfortzu handiagoa egitea erabaki du Udalak. «Landa eremuko bide guztiak egoera onean izateko lan handia egiten dugu, horrek eremu horietako herritarren bizi kalitate hobetzen duelako», adierazi du Josu Labaka zinegotziak. Landa eremuko bide sare egokia izateak, baserrietako jarduera ekonomikoa laguntzen du, eta Udalak lehen sektorearen sustapenaren estrategiaren baitan kokatzen du ahalegin hori. Hala ere, udalek lan horietarako jasotzen dituzten laguntzak «oso mugatuak» direla ere salatu nahi izan du Labakak.

Landa eremuko 120 kilometro baino gehiago daude hormigonatuta, gaur egun. «Bideak egiteaz gain mantenu lanak ere garrantzitsuak dira herritarren segurtasuna bermatzeko, eta horretan ere lan handia egiten dugu», azaldu du Labakak. Hala, urtero, 40.000 euroko diru-poltsa jarri ohi du lan horietarako. Bide horretan, 2017an ere diru-poltsak jarri ditu landa eremuko bide sarea konpondu eta mantentzeko; besteak beste, 100.000 euro bideak konpontzeko, 40.000 euro mantenu lanetarako eta 4.000 euro postontziak konpontzeko.

Recibe nuestras newsletters en tu email

Apúntate