Diario Vasco

Bihar hasiko dira ikasturte honetako dantza jauziak, plazan

Bihar hasiko dira ikasturte honetako dantza jauzien saioak, ohi bezala, 12:00etan. Berrikuntza nabarmena izango dute, izan ere, dantza jauzietako pausoak irakatsiko dituzte Sahatsa Dantza Taldeko kideek saioari ekin aurretik, 11:45ean, plazan bertan.

Mutxikoen proiektua

Herriko hainbat kultur taldek duela hiru urte ekin zioten mutxikoen proiektuari. Aurtengoan, Sahatsa Dantza Taldea, Azpeitiko Ikastola Ikasberriko Dantza Eskola, Azpeitiko Kultur Mahaia eta Kulturaz Kooperatiba elkarlanean arituko dira mutxikoen antolaketan. Elkarlanean antolatu izan dituzte orain artean ere, hileko bigarren igandeetan, herriko hainbat txokotan, eta aurtengoan ere ildo beretik jarraituko du egitasmoak. Alde Zaharretik herriko beste txokoetara zabalduko dira ikasturte honetan. Honela, auzoetan ere mutxikoak dantzatzeko asmoa dago.

Azken hamarkadetan Ipar Euskal Herrian tradizio handia izan duten dantza-jauziek berpizkundea bizi izan dute, eta hegoaldeko herri askotan tradizio hori ikasteko saioak egiteari ekin zaio, tartean, Azpeitian.

Dantzak zabaldu eta herritarrengana gerturatzea da hain justu egitasmoaren helburua, ikusteko ez ezik, gerturatu eta egiteko saioak egiten baitira.

Herritarrei dei egiten zaie parte hartzeko.

Recibe nuestras newsletters en tu email

Apúntate