Diario Vasco
Gaztelekuko begiraleak.
Gaztelekuko begiraleak.

Gurasoei zuzendutako komunikazio txokoa abian jarriko da bihar

  • Bihar, asteazkena, 19:00etan izango du lehen hitzordua Gaztelekuan bertan

  • Gaztelekuak eta GIB-ek sortu duten ekimen berria da

Gazteria sailak, Gaztelekuak eta Gazte Informazio Bulegoak elkarrekin, ekimen berri bat ipiniko dute abian bihartik aurrera. Gurasoen Komunikazio Txokoa deitu dute eta bertan nerabeak dituzten gurasoei laguntza eskainiko zaie. «Gaztelekua, nerabeentzako zerbi-tzua izanik, egunero gerturatzen gara beren errealitatera eta garai horretan bizi ditzaketen egoerak ezagutzera. Nerabezaroaren berezko ezaugarria da aldaketarena. Haur-tzarotik heldutasunera ematen den salto horretan, zalantza, segurtasun eza eta identitate prozesu sakonak ematen dira», azaldu dute bertako begiraleek.

Gauzak horrela, orientazio egoki bat eta elkarbanatzeko espazio bat bermatze aldera egiten dute lan Gaztelekuan. Nerabezaroan, gurasoekin ematen den atxikimendua galtzeak distantzia eragin dezake guraso eta seme-alaben arteko harremanetan. Honek guztiak, komunikazioa oztopatu dezake eta, ondorioz, beldurrak areagotu.

Gurasoen Komunikazio Txokoa errealitate horri erantzun asmoz jarri nahi da martxan. Guraso eta nerabeen artean ematen den garai berezi horretan arreta eskaini asmoz. «Elkarrekin komunikatuz, momentuko errealitateari zentzua ematen saiatu nahi dugu», diote.

Beraz, nerabeekin bizikidetza duten eta garai hori elkarbanatu nahi duten gurasoei eskainitako zerbi-tzua izango da, gazteekin sor daitezken zalantzak eta gatazkak ulertu eta elkarbanatzeko gunea. Orientazioa eskainiko da bertan eta tailerrak edo hitzaldiak eskainiko dituzte. Azken finean, «gurasoak elkarrekin bildu eta beren zalantzak, ekarpenak... elkarbanatu ditzaketen espazio eroso bat sortu nahi da».

Gazte Informazio Bulegoa

Gazte Informazio Bulegoa Plaza Txikian dago. Informazio gehiago nahi izanez gero, zuzendu gib@azpeitia.eus edo 943 15 71 60 telefono zenbakira. Bertako ordutegia honakoa da. Goizez, astelehenetik ostiralera 10:00etatik 13:00etara eta arratsaldez, astearte eta ostegunetan, 17:00etatik 20:00etara.

Gaztelekua Izarraitz pilotalekuaren erakininean dago, parke estaliaren alboan. 12 eta 17 urte bitarteko gaztetxoei zuzenduta dago. Bertako ordutegia astearteetan, asteazkenetan eta ostegunetan, arratsaldeko 17:00etatik 20:00etara bitarteko da. Ostiraletan, 16:30etik 20:00etara eta larunbatetan, aldiz, 17:00etatik 20:30era.