Diario Vasco

Herri hezitzailearen inguruko hitzaldiarekin hasiko da Azoka Herritik

Ekimenean parte hartuko dute tabernariak, aurkezpenean.
Ekimenean parte hartuko dute tabernariak, aurkezpenean.
  • Sanagustin kulturgunean izango da, gaur, 19:00etatik aurrera; Joxe Mari Agirretxe 'Porrotx' eta Amaia Etxabe dira hizlariak

Asteburuan aurreratu bezala, gaurtik igandera bitartean, Azoka Herritik izango da Azpeitian. Herriko hainbat eta hainbat eragile desberdinen elkarkidetzarekin lortutako azoka erraldoia izango da, gune eta ekimen desberdinekin baina filosofia bera. Gaur emango zaio hasiera ekitaldi desberdinei. Hitzaldia izango da Sanagustin kulturgunean, 19:00etan. Joxe Mari Agirretxe 'Porrotx' eta Amaia Etxabe izango dira Herri Hezitzailearen inguruan hitzaldia eskainiko dutenak. Herri Hezitzailea Euskal Herriko hainbat herritan txertatzen ari den proiektua da. Helburu nagusia hezkuntza eta heziketa prozesua ikuspuntu integralago batetik ikusarazten lagun-tzea da.

Oro har, «hezkuntza bizitza osoan etenik gabe burutzen den ikaskun-tza irakaskuntza prozesu moduan definitzen da; eta hezkuntza prozesu honen ardura, elkarbanatua denean, emaitza hobeak lortzen direla ondorioztatu da. Hezkuntza prozesuaren ardura familia, ikastetxe eta jendartearen artean elkarlanean burutzen denean, alegia», azaldu dute antolatzaileek. Beraz, herri mailako proiektu euskaldun, anitz, parte hartzaile, parekide eta komunitarioa eraikitzea da Herri Hezi- tzailearen xedea. «Eskolaz gain, norbanako, elkarte, eragile... guztiok garelako hezitzaile; eta, aldi berean, hezigarri gure eguneroko jardunean. Herri Hezitzailea filosofia aldaketa da, egiteko moduak birpentsarazi nahi dizkigun mugimendua».

Urola gustagarri

Lehen ekitaldi hau amaitu ostean, ostegunetik, Urkomek eta Iraurgi Berritzenek bultzatuta, Urola Gustagarri ekimena presente izango da beste urte batez Azokaren laugarren edizio honetan. Bi ekimen ezberdin izango dira, bata tabernekin eta bestea jatetxeekin. Bihartik, ostegunetik, 19:00etatik 21:00etara bitartean, bertako tomatedun pintxoak eskainiko dira. Bertako tomateaz eginiko pintxo ezberdinak dastatu ahal izango dira 3 egunez. Pastorkua, Juantxo Txiki, Berdie, ISB, Ganbara gourmet ardotegi&delicatesen, Etxaun delicatesen kafetegia, Pikua, Sanagustin, Aisialdi gastro-tokia, Eguzkitza, Zuhatz, Korrale, Orkatz, Topa, Etxezuri eta Ertz tabernek hartuko dute parte. Guztira 16 taberna izango dira eta bertako ekoizleen tomatea erabiliz, pintxo ezberdinak egin ahal direla erakutsiko dute. Beraz, pintxoak, bihar, hilaren 15ean, pintxo potean, 16an arratsaldez eta 17an egun osoz dastatu ahal izango dira.

Bestalde, beste edizioetan bezala, ohikoa den menu ezberdinak prestatuko dituzte herriko hainbat jatetxek. Larrañaga, Mikel Uria, Sagasti Zahar, Kiruri eta Kiroldegiko jatetxeek hartuko dute parte. Garaiko eta azokan erosi ahal diren produktuekin osatuko dituzte menuak.

Esku liburuak atera dituzte menuekin eta berauen plateren errezetekin. Horrela jatetxeetan menuak gozatuz gain etxeetan edo elkarteetan prestatu ahal izango dituzte Urola Gustagarriren eskaintzak.