Solidaritate pintxoaren antolatzaileek euren esker ona adierazi diote herriari

Gazteak eta Garapena taldeko kideak larunbateko ekimenean./
Gazteak eta Garapena taldeko kideak larunbateko ekimenean.

Guztira 2400 euro jaso dira eta Beninera bidaliko dira kaleko umeei laguntzeko

JOAQUIN SUDUPE AZKOITIA.

'Solidaritate pintxoa eta bigarren eskuko denda' eta Alai Batzak umeentzat antolaturiko jolas eta tailerrak ospatu ziren larunbatean Plazan.

Jai giroko ekimena, Beninen Salestarrek kaleko umeei laguntzeko dituzten proiektuen alde izan zen.

Eguraldi kaskarra egin zuen, baina hala ere, bisitari ugari hurbildu zen Kontzejupera.

Antolatzaileen adierazi nahi izan dute jende askoren laguntza jaso dutela Gazteak eta Garapena taldeak antolatutako ekintza honetan. «Azkoitiko hainbat harakin eta okinek euren jeneroa eman digute opari (Bittor, Iñigo Agirre, Traki, Zumardi, Otzarreta, Landakanda, Beheko Okindegia). Elkarte edo soziedeek ere laguntza handia eman digute (Ardatz, Txuri Urdin, Martitte, Plaza Berri, Hiru Iturri, Izkitturri, Xoxote, Errebaleko Txokoa, Iraurgi, Beti Poz, Abiola). Hainbat tabernarik ere edaria edota pintxoak eman dizkigute doan (Bar Alejandro, Arkupe, Batzokia, Orbela, Zurt, Latz, Dean, San Agustin). Gainera hainbat dendarik ere euren babesa eman digute (FK, Ameztoi, Berastegi Baserria - Xoxote gazta, Itziar). Eta ezin ahaztu familia askok etxean prestatutako pintxo eta postreak ekarri zituztela musutruk. Kontua da barra inoiz baino hornituagoa egon zela: pintxo ugari, aukera handia eta kalitate bikaina», azpimarratu dute.

Bestalde, jende askok euren opariak eskaini zituen bigarren eskuko dendan saltzeko. GG taldeko gaztetxo ugari aritu zen barra atendi-tzen, dendan saltzen, zozketako bileteak saltzen eta jende ugari joan zen pintxo eta tragoak dastatu eta beraien laguntza ekonomikoa ematera. Horiei guztiei euren esker ona adierazi nahi die.

Guztira, 2400 euro jaso dira eta Beninera bidaliko dira. Bestalde zozketako azken bileteak ere saldu dira eta saria azaroaren 2ko ONCE zenbakiarekin emango da. Azkoitiko Udalaren laguntza ere nabarmenduz, GG taldekoen izenean, eskertu nahi izan dituzte parte hartzaile eta laguntzaile guztiak.

Fotos

Vídeos