Anaitasunaren lehen garaipena pasa den denboraldiko txapeldunaren etxean

Lehen minututik ondo kokatu zen taldea, eroso sentituz Ibaiako berdegunean, eta gogotsu ospatu zituzten lortutako golak. / PINGUY ALBIAZU
Lehen minututik ondo kokatu zen taldea, eroso sentituz Ibaiako berdegunean, eta gogotsu ospatu zituzten lortutako golak. / PINGUY ALBIAZU

Larunbatean 17:30ean Txerloian, Santutxu taldea hartuko du Anaitasunak ezustekoa eman zuen igandean, Ibaia zelaian, 1-2 gailenduz Alaves taldeari

JOAQUIN SUDUPE AZKOITIA.

Hirugarren Mailako taldeak hiru puntu batu zituen igandean arerio zail baten aurrean. Izagirrek bosgarren minutuan korner jokaldian lortu zuen gola, eta lehen zatia amaitu aurretik aukera gehiago izan bazituzten ere, huts eta batekoarekin joan ziren aldageletara.

Bigarren zatian, Alaves erritmo eta intentsitate gehiagorekin zelairatu zen berdegunera. Anderrek huts eta bikoa egin zuen talde jokaldi bikain bati amaiera perfektua emanez. Azken minutuetan Alavesek azken saiakera egin zuen, eta eskuetan izan zuten azken minutuetan berdinketa. Lortutako golak gogo-tsu ospatu zituzten mutilek, denboraldiko lehen garaipena lortu ostean Alaves B taldearen aurka, iazko txapeldunaren etxean.

Lehen minututik ondo kokatu zen taldea, eroso sentituz Ibaiako berdegunean, eta horren ondorioz aukerak izan zituzten .

Defentsa sendoa

Taldea zelai erdian kokatu zen hasieratik, eta Alavesi espazio gutxi utzi zion nahi zuen futbola egiteko.

Defentsan sendo agertu ziren mutilak, Alavesek ez zion lanik eman Arruti atezainari lehen 45 minutuetan, eta Anaitasunak etxekoen zelaian baloia hartu zuenean arriskua sortu zuen. Atera jaurtiketa batzuk egin zituzten, baina garbiena atsedenaldira iritsi aurreko jokaldian izan zuten. Segituan aurreratu zen markagailuan Anaitasuna.

Mikel Arzalluzek jokoan jarritako kornerra bakar-bakarrik errematatu zuen Ion Izagirrek bigarren zutoinean, eta buruz ate barrura bidali du baloia atzelariak.

Bigarren zatian aurkaria intentsitate, abiadura eta erritmo gehiagorekin zelairatu zen eta 53. minutuan gertu izan zuten gola. Neurketa, baina, huts eta bikora pasatu zen. Zelai erdiko falta ezker hegalera zabaldu zuten gureek, eta han, Mikel Arzalluzen eta Ander Moyaren artean jokaldi bikaina eginez ; Ander Arabaolazak, huts eta bikoa egitea lortu zuen.

Bi goleko errenta alde zuten gureek, eta Alaves, ezinbestean, aurrera egin beharrean aurkitu zen.

Hegaletatik arriskua sortzeko gai izan ziren arabarrak, eta Anaitasunarentzat lehen estutasunak iritsi ziren. Anaitasuna defentsa lanean zentratu zen baina geldikako jokaldietan sufrituz. Horrela, partida amaitzeko bederatzi minutu falta zirela, falta jaurtiketa batetik murriztu zuten aldea etxekoek.

Golarekin, Alavesen eraso oldea etorri zen. Amaieran asko sufrituta, baina Anaitasunak hiru puntu batu zituen Hirugarren Mailako zelai zail batean.

Denboraldiko lehen garaipena batu dute Igor Quindosen mutilek. Datorren asteburuan, zapatuan 17:30ean, Txerloiako lehen garaipenaren bila zelairatuko dira gureak Santutxuren aurka.

Fotos

Vídeos