Diario Vasco

Internet eta sare sozialen erabilera egokia egiteko lana eskoletan eta kalean

Aurkezpenean Udalak eta ikastetxeak hartu zuten parte.
Aurkezpenean Udalak eta ikastetxeak hartu zuten parte. / UDALA
  • Herritarrei zuzenduriko hitzaldiak antolatu dira. Azkoitian bihar eta hilaren 24an izango dira Elkargunean 18:30ean

Internet eta sare sozialak dakartzaten onurekin batera arriskuak ere badaude. Horren aurrean eta internet modu egokian erabiltzearen inguruan kontzien-tziazio beharra ikusita, Iraurgi Berritzenen koordinaziopean, Azkoiti eta Azpeitiko Udalek, bailarako ikastetxeek eta gazteria sailek bat egin dute eskoletan eta kalean gaia jorratzeko, ikastetxeetan formazio saioak eginez eta hitzaldi zikloa antolatuz.

Programa aurkezterakoan, «heziketaren ardura ez da ikastetxeena soilik. Gurasoena da, gizartearena, herriarena, bailararena. Elkarlanari esker erantzun egokia eman diezaiokegu», esan zuen Nekane Larrañagak, hezkuntza zinegotziak.

Horregatik eskoletatik haratago eraman da proiektua. Hiru esparrutan egin da lan: eskoletan LH4 mailako ikasleekin formakuntza saioak egin dira ikastetxe guztietan. Halaber, hezkuntza zentroetako klaustroarekin ere lan saioak egin dira gaur egun kasu askotan ikasleen ezagutza internetaren bueltan irakasle edo hezitzaileena baino handiagoa delako. Azkenik, eta zirkulua ixteko, herritar guztiei zuzenduriko hitzaldiak antolatu dira.

Azkoitian bihar eta 24an

Hitzaldiak Azkoitian bihar eta 24an izango dira Elkargunean, arratsaldeko 18:30ean. Biharkoa 'Internet: aukerak eta arriskuak' da eta bigarrena, 'Sare sozialak: erabilera egokia'. Ementic-Internet Segurua eta Hezkuntza zentroko Mikel Agirre izango da hizlaria eta bera da baita eskoletako programa aurrera eraman duena. Bere hitzetan, gauza bat da tresnak ezagutzea baina «gaitasun digitalak bereganatzea» da garrantzitsuena, internet eta sare sozialak modu seguruan eta arduratsuan erabiltzeko.

Programaren aurkezpenean Mikel Agirrek, Iraurgi Berritzeneko Josu Sorazuk eta Azkoiti eta Azpeitiko hezkuntza zinegotziak, Nekane Larrañagak eta Leire Goenagak hartu zuten parte, hurrenez hurren. Ikastetxeetako ordezkariak eta gazteria teknikariak ere bertan zirelarik.

Recibe nuestras newsletters en tu email

Apúntate