Diario Vasco

Hiru puntu garrantzitsu lortu zituen Anaitasunak Mutrikuren zelaian

Sasoi honetan iaz zuena baino puntu bat gehiago du.
Sasoi honetan iaz zuena baino puntu bat gehiago du. / SUDUPE
  • Neurketa estua eta gogorra jokatu zuten bi taldeek baina garaipena azkoitiarrentzat izan zen

Mutrikutik zerbait ekartzeak asko balio zuen, eta Anaitasunak ez zuen hutsik egin. Borroka, lehia, intentsitatea, erritmoa eta lana izan ziren neurketaren giltzarriak. Anaitasuna borrokarako ondo prestatuta joan zen Mutrikura, eta neurketan etxekoek erakutsitako futbolari erantzuteko moduan izan ziren mutilak. Lehen zatian Iñigo Arzalluzek aukera garbia izan zuen huts eta batekoa egiteko. Bigarren zatian Iker Pastrian handi baten oinetatik hasitako jokaldian, Mikel Arzalluzi egindako penaltia adierazi zuen epaileak. Maisuki jaurti zuen baloia Iñigo Arzalluzek Anaitasunari hiru puntu garrantzitsu emateko.

Lehen zatian behetik gora egin zuen Igor Quindosen taldeak. Ondo zelairatu ziren mutilak, baina lehen aukerak etxekoek egin zituzten. Borroka handiko lehen minutuak izan ziren, eta Anaitasuna zelaian hasieratik ondo jarri zen arren, mutrikuarrek arriskua egin zuten Xubanen area inguruan. Bigarren zatiak ere lehenengoaren bidetik jarraitu zuen. Intentsitate handiko futbola nagusitu zen zelaian, eta bi taldeek aukera bana izan zuten epaileak penaltia adierazi aurretik.

Mikel Arzalluzi eginiko penaltiaren ondoren, Iñigo Arzalluzek ezin-hobeto jaurti zuen baloia atera, eta orduerdi falta zela aurretik jarri zuen taldea. Amaiera aldera Mutriku baloi luzeekin Anaitasunari min egiten saiatu zen, baina neurketa osoan bezala, Anaitasunaren mutilak partidan sartuta, serio egon ziren defentsan eta ez zuten gehiegi sufritu. Inork gutxik irabazten duen zelaian garaipena lortu zuen Quindosen taldeak. Askorako balio duten puntuak dira San Miguel zelaian batutakoak.

Datorren asteburuan Anaitasunak Zarautz jasoko du etxean. Aurreko denboraldian Txerloian irabaztea lortu zuen taldeetako bat da, aurkari arriskutsua beraz.

Sasoi honetan Anaitasunak iaz zuena baino puntu bat gehiago du. Zazpigarren jardunaldian iaz 17 puntu zituen Quindosen taldeak, eta gaur 18 punturekin sailkapeneko lehen postuan da Aretxabaletarekin batera.

Recibe nuestras newsletters en tu email

Apúntate