Erniarraitz Bertso Elkarteak bailarako Bertso Eskola sortu du

Erniarraitz Bertso Elkarteak bailarako Bertso Eskola sortu du Azpeitiko eta Azkoitiko Udalen laguntzarekin. Helburua bertsozaletasuna sustatzea da, horretarako transmisioa «oinarririk sendoena», bermatuz. Udaletxean aurkeztu dute ekimena elkarteko kideek eta adierazi dutenez jada 60 bat laguneko taldea dute eskolan.

Elkartea ez da gaur jaioa. 2000. urtean ekin zion lanari baina azken urteetako hausnarketaren ondoren, susperraldi bat ematea erabaki dute kideek. «Ikastetxe bakoitzak du bere bertso eskola baina azkenean geto gisa funtzionatzen dute eta guk zabalkundea bermatu nahi dugu, bertso eskolak herriratu». Horrek «lan profesionalago» bat eskatzen duelako, bizpahiru urteko eztabaida eta gero, haur eta helduentzat eskola sortu dute.