Diario Vasco

Udalak euskaraz publizitatea egiteagatik diru-laguntzak emango dizkie merkatariei

  • Establezimenduetan euskararen presentzia indartze aldera dira eta eskaera epea zabalik da urriaren 31 bitartean

Merkataritzan euskararen erabilera sustatzeko asmoz, Udala hainbat urrats ematen ari da merkatariekin egindako parte-har-tze prozesuan ondorioztatutakoaren haritik, eta «betiere, haien eskaerei erantzuteko xedez» azpimarratu dute.

Merkatariei eginiko galdetegian emandako erantzunak aztertu ostean, Udalak bi berrikuntza gauzatuko zituen. Batetik, publizitatea euskaraz egiteagatik diru-lagun- tzak emango ditu eta bestetik, sare sozialen inguruko ikastaro bat antolatuko du merkatarientzat.

Lehenengoari dagokionez, orain arte ez zegoen publizitatea euskaraz egiteagatik laguntzarik. Aurten aldatu da hori estreinakoz. Horretaz gain, establezimenduek aukera dute diru eskaera egiteko errotulua, irudi korporatiboa edo webgunea euskaratuz gero.

Programa informatikoak euskaratzeagatik ere jaso daiteke diru-laguntza, besteak beste. Eskaerak egiteko azken eguna urriaren 31 da.

Diru-laguntzen inguruko berri zuzena jasotzeko, Udalak uda aurretik diptikoak banatu zituen establezimendu guztietan.

Banaketa bera jarraipena egiteko aprobetxatu zen, esaterako, merkatariek lehenengo hitza zein hizkun-tzatan egiten duten jasotzeko informazio gisa.

Sare sozialak

Diru-laguntzez gain, merkatariek sare sozialen erabileraren inguruko ikastaroa eskatu zieten Udalari, adibidez, Facebook salmentak areago-tzeko nola erabili erakutsiko zieten ikastaro bat, alegia.

Horren harira; «oraindik xehetasunak erabat lotu gabe dauden arren, udazkenean merkatariek aukera izango dute sare sozialetan duten abilezia areagotzeko» azpimarratu dute Udaleko arduradunek.