Diario Vasco

Garaipen zabala eta garrantzitsua Aloña Mendiren aurka lortutakoa

Beldurrik gabe zelairatu zen Aloña Mendi langile eta ausart bat agertu zen Txerloian.
Beldurrik gabe zelairatu zen Aloña Mendi langile eta ausart bat agertu zen Txerloian. / SUDUPE ARGAZKIAK
  • Bi jardunalditan sei gol egin ditu taldeak, eta bakarra ere ez du jaso

Anaitasunak garaipen zabala lortu zuen larunbatean, Aloña Mendiren aurka. Mikel Arzalluzek ireki zuen markagailua 21. minutuan, eta 88. minutuan Ander Pastrianek egindako bosgarren golarekin itxi bigarren zatiaren amaieran. Aloña Mendi langile eta ausart bat agertu zen Txerloian, baina jokalari baten galerak eragin handia izan zuen bisitarien jokoan.

Xabier Oroz Gipuzkoa Basket taldeko jokalari azkoitiarrari egindako omenaldiarekin hasi zen Txerloiko neurketa. Europako 20 urtez azpiko txapelketan urrea lortu zuen Orozek, eta klubeko bazkide eta jarraitzailea den heinean, Anaitasunak ohorezko sakea egiteko aukera eskaini zion jokalariari. Txalo artean hartu zuen leporaino beteta zegoen Txerloiko harmailak saskibaloi jokalari gaztea.

Ezker hegalaz baliatuz

Gero hasi zen partida, eta ezker hegala baliatu zuen Anaitasunak lehen zatian min egiteko, hegal horretatik iritsi baitziren lehen bi golak.

Lehena Mikel Arzalluzek egin zuen. Ordura arte neurketa orekatua ari zen izaten, Aloña Mendi ausart zelairatu baitzen berdegunera, beldurrik gabe. Anaitasunari asko kostatu zitzaion partidaren hasierako minutuetan egin nahi duen jokoa egitea, baina Arzalluzen gola eta gero, dena errazagoa izan zen.

Bi eta hutsekoa 26. minutuan egin zuen Anaitasunak. Oraingo honetan ere ezker hegalean hasi zuen jokoa korner aldaratze bat eta gero.

Atsedenaldiaren ostean, errespetu handiz irten ziren bi taldeak zelaira. Anaitasuna neurketa itxiko zuen golaren bila eta Aloña Mendi, neurketan sartuko zuen golaren bila.

71. minutuan penaltia egin zioten Iñigo Arzalluzi; bera izan zen jaurtiketa egin zuena, eta ez zuen hutsik egin. Geldikako jokaldian ere arriskutsu azaldu zen Anaitasuna, eta laugarren gola modu honetan iritsi zen eta bosgarren eta azken gola irten berrien eskutik etorri zen. Garaipen zabala, eta garrantzitsua. Bi jardunalditan sei gol egin ditu taldeak, eta bakarra ere ez du jaso. Datorren asteburuan Lasarteko Michelin zelaian Ostadar taldearekin neurtuko dituzte indarrak. Anaitasunak emaitza onak lortu ditu azken urteetan Michelinen, eta bide beretik jarraitzeko asmoz joango dira.