Artzabalgo plaza berritzeko hitzarmena sinatu dute bizilagunek eta Udalak

Bizilagunak eta Udala akordiora iritsi dira. /
Bizilagunak eta Udala akordiora iritsi dira.

Udalak hartuko ditu bere gain kostu guztiak eta lanak datorren urteko udazkenean hasiko dira

JOSU ARANBERRI USURBIL.

Urte luzez epaitegietan katramilatuta egon den auziari konponbidea eman zaio, eta 2018. urteko udazkenean hasiko dira Artzabalgo plaza konpontzeko lanak. Proiektuak aurreikusten dituen kostu guztiak Udalak hartuko ditu bere gain, hau da, obrak guztira 267.000 euroko kostua eragingo du, eta Udalak bi urtetan ordainduko du.

Inpermeabilizazio kostua, aldiz, Puntapax kaleko 10-12-14-16 bizilagunek ordainduko dute. Kostu txikia izango du horrek, ia 64.000 euro, hain zuzen ere. Hala geratu da jasota Udalak eta bizilagunen lehendakariak sinatutako hitzarmenean.

Plazako tabernak eta komertzioak eskatuta, lanak uda igaro ondoren hasiko dituzte, euren komertzioei ahalik eta gutxien eragiteko. 2018ko aurrekontuetan 150.000 euro jaso dira lan horietarako eta gainerakoa 2019an ordainduko da. Udalak beharrezkoa ikusi du plazako zoladura konpontzea, oso egoera txarrean baitago baldosa. Halaber, lan horiek baliatuko dira, inpermeabilizazioa berritzeko, berme epea iraungita duelako.

Udalak obra guztia amaitu artean bere gain hartuko ditu gastu guztiak, baita inpermeabilizazio gastua ere. Lanak amaitutakoan, bizilagunek Udalari itzuliko diote aurreratutako dirua, eta bi fasetan ordaintzeko aukera izango dute.

Contenido Patrocinado

Fotos

Vídeos