Arraun Elkarteko bi traineruak oso maila onean dabiltza oraingoz

Bigarren trainerua proba nagusian atera zen uretara. Esperantzak lan txukuna egina zuen Bidasoan eta Orion bigarren testa zuten Gorka Etxeberriaren mutilak. Udarako KAE-1 Liga oraindik urrun dago baina bertan lan ona egitea dute helburu eta Oriako jaitsieran ikusi zenez lanak ondo egiten ari dira.

Sailkapen nagusian 11. amaitu zuten Esperantzako mutilek baina garrantzitsuena da KAE-1 Ligako traineru guztien aurretik helmugaratu zirela. Gazteak bere lekua hartzen hasia dute eta denboraldi eder baten aurrean egon gaitezke 2018 honetan. Deustu, Isuntza, Zarautz eta Astillero atzetik utzi zituzten 20 minutu eta 15 segundoko denborarekin, irabazle atera zen Hondarribitik 52 segundotara. Denera 43 traineru lehiatu ziren maila honetan eta orokorrean berriz 90 traineru eta 4 llagut.

Bateletara itzulita, asteburu honetan Gipuzkoako Ligaren jardunaldi berria lehiatuko da. Bihar larunbata goizeko 10:00etatik aurrera Zumaian izango dira Getariako batelak. Joan den asteburuan Tolosan lehiatu beharreko saioa bertan behera utzi zen beraz gogoz ekingo diote gure arraunlariak biharko saioari, Batel Ligako seigarren jardunaldiari.