Andatza Mendi Elkarteak irteera berria eta Mendi Astea antolatu ditu

'K2 Zerua ukitzen' ikus-entzunezkoa eskainiko da hilaren 23an./
'K2 Zerua ukitzen' ikus-entzunezkoa eskainiko da hilaren 23an.

Arabako Elgeako zerra aldera egingo dute txangoa. Mendi Astea hilaren 23, 24 eta 25ean egingo da

JOSU ARANBERRI USURBIL.

Andatza Mendizaleen Kirol taldeak antolatuta mendi irteera izango da igande honetan. Urriko ibilaldian Anboto inguruan ibili ostean, oraingo honetan Araba aldera joango dira Arabako Elgeako zerra ezagutzeko aukera izango delarik. Larrea herritik abiatuko dira, eta 25 kilometro inguruko ibilaldia egin ostean Araiara iristeko asmoa dute.

Autobusez joango dira Araba aldera. Goizeko 7:00etan izango dute irteera Oiardo udal kiroldegi aurretik eta ohikoa den bezala plaza mugatuak izango dira. Ibilaldi amaieran egingo den otordurako janaria norberak eraman beharko du eta edaria Andatza Mendizaleen Kirol taldeak eramango du.

Bihar izango da izena emateko azken eguna. Andatzatik aditzera eman denez izen-ematerakoan 10 euro ordaindu beharko dira Andatza Mendizaleen Kirol taldeko bi kontuetako batean: Rural Kutxa 3008 0259 1630 0543 0321 edo Kutxabank 2095 5069 0710 6848 9805. Gogoratu Andatza Mendizaleen Kirol taldeak antolatzen dituen irteeretan parte hartzeko derrigorrezkoa dela, mendiko federatua izatea eta aseguru txartela indarrean edukitzea.

Mendi Astea

Bestalde, hilabete honen amaierarako Mendi Astea ere iragarri du Andatza Mendizaleen Kirol Taldeak. Azaroaren 23, 24 eta 25ean izango da. Azaroaren 23an, ostegunean, 'K2 Zerua ukitzen' emanaldia izango da Sutegi eraikineko auditorioan arratsaldeko 19:30ean hasita. Poloniako, Erresuma Batuko eta Alemaniako sortzaileen elkarlanetik 2015ean sortutako proiektua da 'K2 Zerua ukitzen'. 1986ko udan mundu osoko dozena bat herrialdetako espedizioek K2 mendia aldi berean igotzeko egin zuten saiakera kontatzen du filmak, mendian hil ziren 13 eskalatzaileetako lau seme-alabaren begietatik. 2015eko Bilbao Mendi Film Festibalean aurkeztutako eta saritutako ikusentzunezkoa da.

Hurrengo egunean, hilaren 24an, ostiralean, Pablo Landaluzeren 'Biziminez' dokumentala ikusteko aukera izango da Sutegin 19:30ean. Josu Iztueta eta Antxon Arza, bi adiskide AEBko errepidean «amets txiki bat betetzen». Errepideko zeharkaldia bera baino garrantzitsuagoa da barne bidaia: oroitzapen eta bizipen eder eta ez hain ederrak, jolasak, eta negarrez eta umorez gaindituko dituzten bidean aurkitutako oztopoak. Bizitzari buruzko gogoeta sakona, bi adiskideren erretratu zintzoa, bizimina transmititzen duen road movie hunkigarria da.

Azkenik, azaroaren 25ean, larunbatean, 29 kilometro inguruko mendi irteera burutuko dute, Usurbildik Zarautza joango direlarik (Usurbil-Andazarrate-Pagoeta-Zarautz). Goizeko 7:30ean abiatuko dira frontoi atzetik eta ondoren bazkaria egingo dute Zarauzko Euskalduna jatetxean. Bazkarira joateko izena aldez aurretik eman beharko da eta izena ematerakoan ordaindu behar da bazkaria, 17 euro hain zuzen ere. Hilaren 21a izango da izena emateko azken eguna eta ohiko 2 kontuetan egin beharko da ordainketa.

Horrez gain, Sutegin burutuko diren ekitaldiak hasi aurretik, 2017ko federatu txartelak berritu eta asteburuko ibilaldirako izena emateko aukera izango da Sutegin bertan.

Fotos

Vídeos