Diario Vasco

'Hotzak akabatzen' BTT proba izango da hilaren 29an

Iazko irteeran mendi bizikleta ugari bildu ziren.
Iazko irteeran mendi bizikleta ugari bildu ziren.
  • Mendi bizikleta zaleek aurten ere Andatza aldeko bideetan zehar gozatzeko aukera izango dute

Irisasi BTT taldeko kideak mendi bizikleta martxan antolatze lanetan ari dira beste behin ere. Gabonak pasa dira dagoeneko eta ohikoa den bezala hilaren amaiera herrian kirol proba garrantzitsua dena burutuko da.

Duela bost urte antolatu zuen Irisasi BTT taldeak Irisasi BTT 'Hotzak akabatzen' bizikleta martxa herrikoia lehenengo aldiz eta arrakasta begi bistakoa izan da. Urtez urte mendi bizikleta zale ugari gerturatu izan da herrira eta aurten ere seigarren aldiz mendi proba hau burutzeko aukera izango dute urtarrilaren 29an.

Irisasi BTT taldekoek 2017ko edizioa aurrera eramateko prestaketa lanetan buru belarri sartuta daude. Urtarrileko azken igandean, aurten hilaren 29n, da hitzordua eta hotza eta ura izango dira, ziur asko, berriro ere nagusi mendiko bideetan.

Bi ibilbide

Oraingo honetan 9:00etan izango da irteera frontoian eta 26 kilometro inguruko ibilbide motza eta 36 kilometro inguruko ibilbide luzea izango dituzte aukeran partaideek, bakoitzak bere indarraren arabera, bata ala bestea egiteko. Ibilbidea aldatu daiteke eguraldiaren baldintza eta mendiaren egoeraren arabera. Trabesia herrikoia izango da, denborarik hartu gabe, eta herriko frontoian izango da irteera nahiz helmuga. Probaren bukaeran eta laguntzaileei esker, opari zozketa zabala egingo dute antolatzaileek frontoian, hamarretakoarekin batera. Irisasi BTT taldekoek bereziki eskertu nahi izan dute herriko dendari eta tabernarien laguntza, txirrindularien hamarretakoak eta gainontzeko guztia prestatzeko ezinbestekoa izango da eta.

Partehartzaile guztiek sotokasko bat jasoko dute opari modura. Horrez gain, dozenaka opari zozketatuko dira parte hartzaile guztien artean. Bidean zehar, janaria eta edari beroa ere izango dituzte eta proba amaitzean ere hamarretakoa banatuko da parte hartzaileen artean. Bidean asistentzia izango da eta dutxa beroa hartzeko aukera ere bai Oiardo kiroldegian. Mangerak ere jarriko dira bizikletak garbitzeko.

Izen emateari dagokionez, internet bidez egin daiteke kirolprobak.com helbidean hilaren 1az geroztik 27a bitartean. Federatuek 15 euro ordaindu beharko dituzte eta federatu gabeek 18 euro. Probaren egunean bertan goizeko 8.45ak arte izena eman ahal izango da, eta guztiek 22 euro ordaindu beharko dute.

Kirol ekimen hau antolatu izanaren helburua honakoa da, «partaide guztiei mendi bizikletaz gozatzeko aukera eskaini nahi zaie, neguko egunik hotzenetan bada ere, eta hortik probaren izena».

Trabesia honen inguruko xehetasun guztiak www.andatza.com helbidean topa ditzakete interesa duten guztiek.

Recibe nuestras newsletters en tu email

Apúntate