Diario Vasco

Usurbila ere iritsi ziren Errege Magoak

Beraiekin solasean. Frontoian Errege Magoekin egon eta beraiekin hitz egiteko aukera izan zuten herriko haurrek atzo arratsaldean.
Beraiekin solasean. Frontoian Errege Magoekin egon eta beraiekin hitz egiteko aukera izan zuten herriko haurrek atzo arratsaldean.
  • Ume askoren ilusioa bete zen beste urte batez eta herrian ere hiru erregeak ikusi eta beraiekin egoteko aukera izan zuten Usurbilgo haurrek

Errege Magoak atzo iritsi ziren Usurbilera, urteroko hitzordua betez. Ume askoren ilusioa bete zen beste urte batez eta herrian ere hiru erregeak ikusi eta beraiekin egoteko aukera izan zuten Usurbilgo haurrek.

San Esteban ermita ingurutik etorri ziren Usurbil aldera Meltxor, Gaspar eta Baltasar. Zaldi gainean herriko auzo desberdinetako bideetan ibili ziren, hainbat ume atzetik zituztela eta milaka karamelo banatuaz. Izan ere, bart gauean etxeetan opariak uzten ibiliko baziren ere, atzo arratsaldean goxokiak banatu zituzten kabalgata ikustera gerturatu zirenen artean. Hotz handia izan zen atzokoan, baina haurren ilusio beroak arindu zuen aurtengo kabalgata.

Ohikoa baino beranduxeago bada ere iritsi ziren herriko pilotalekura. Herritar ugari zituzten han zain, ume, gaztetxo, gazte, guraso eta aiton-amonak... Guztiak frontoian bildu ziren Errege Magoak bertan zegoen Jaiotzara nola hurbiltzen ziren ikustera. Izan ere, Jesus haurtxoa agurtzera joan ziren eta bertan bildutakoentzat ere hitz batzuk izan zituzten.

Ondoren, oholtzatik jaitsi eta eserleku dotoreetan eseri ziren, herriko haurrekin lasai-lasai egon asmoz. Meltxor, Gaspar eta Baltasar haurrekin hizketan egon ziren hauen gozamenerako. Bien bitartean, laguntzaileek milaka goxoki banatu zituzten. Gaztetxoak hauek biltzen jarduten zuten bitartean. Negarrez batzuk, irribarrez besteak... modu desberdinetara hartu zituzten.

Goizean, berriz, hiru Errege Magoen karteroaren bisita izan zen Usurbilen. Herriko haurrek beraien oparien zerrendarekin eskutitza emateko aukera izan zuten urtero bezala.

Eta ez hori bakarrik, hauen kontu txikiak ere entzun zituen hauek magalean zituen bitartean. Ekarri ote dituzte erregeek eskatutako opari denak?

Recibe nuestras newsletters en tu email

Apúntate