2016. urtea korrika agurtu zutenekoa

Herriko pilotaleku inguruan izan zuten hitzordua 17:00etan eta ordurako frontoi ingurua herritarrez bete zen. Azken urteetan bezala, txikienak aurrean zirela irten zen proba. Hauek ez zuten kaxko inguruan 4 kilometro inguruko ibilbidea osatu beharrik, itzuli bat emanda nahikoa baitzuten. Hala ere, izan ziren proba osoa egin zutenak ere. Gainontzekoak, batzuk azkarrago, besteak mantsoxeago jai giroan egin zuten berriz ere frontoian amaitu zen proba. Mozorrotuta korri egitera ere animatu ziren batzuk eta buruhandi bat ere lasterka ikusi genuen, nahiz eta oraingoan ez umeen atzetik.

Ez zen irabazlerik izan, baino parte hartzaileetako asko Hurbilago elkarteak egindako zozketetako opariekin itzuli ziren etxera. Izan ere, Hurbilago elkarteko komertzio, taberna eta bestelakoek jarritako opari ugari izan ziren lasterkarientzat. Urteberria iristearekin batera, bestelako festa izan zen kaxkoan. Aros DJ-a izan zen Askatasuna plazan musika jartzeaz arduratu zena eta herriko tabernetan ere giro paregabea izan zen 2017. urteari behar bezalako ongi etorria eman asmoz.