Diario Vasco

Erlea, guztiaren gainetik igandean

Jende ugari. Eguraldiak ere ederki  lagundu zuen igandean eta Erle Egunaz gozatzera hurbildu zirenak asko izan ziren.
Jende ugari. Eguraldiak ere ederki lagundu zuen igandean eta Erle Egunaz gozatzera hurbildu zirenak asko izan ziren.

Azaroko azken igandearekin batera hitzordu garrantzitsu bat izan zen Usurbilen: Erle Eguna. 18. edizioa izan da aurtengoa eta beste behin ere jende ugari izan zen herriko Dema plaza eta frontoi inguruan. Eguraldia lagun, goiz ederra pasatzeko aukera izan zuten igandean bertara gerturatu ziren guztiek.

Dema plazan erletik eratorritako produktuak ikusi eta erosteko aukera izan zen beste behin ere. Ezti poto ugari topatu zitezkeen bertan, baita gozogintzako hainbat produktu ere, baina erlearen inguruan beste hainbat produktu sortzen direla ere agerian gelditu zen: argizariak, ukenduak, propolia... Horrez gain bestelako jakiak ere topatu zitezkeen postu horietan, gazta, fruitu lehorrak edota txerrikiak.

Erle Egunean ikusmina sortzen duen beste ekitaldi bat ezti lehiaketa izaten da. Euskal Herriko txoko desberdinetatik etorritako eztigileak izan ziren aurtengo edizioan ere beren ezti desberdinak lehiaketara aurkeztu zituztenak eta goizean goizetik epaimahaikoak nahikoa lan izan zuen eztirik onenak zeintzuk ziren erabakitzen.

Belauntzako Ramon Lopetegirena izan zen mila lore eztietan onena eta Andoaingo Aitor Barandiaranenk lortu zuen 2. postua. Ezti ilunetan Beñat Elorza zeraindarrak aurkeztutako eztiak lortu zuen txapela eta Arbizuko Mikel Berastegirenak 2. postua. Azkenik, ezti argietan Patxi Franko andoaindarrak eskuratu zuen garaipena eta Agustin Zabala hernaniarrak 2. postua. Gozogintza lehiaketan, berriz, Kandi Tolosak aurkeztutakoa izan zen epaimahaiarentzat onena.

Bestelako ekintzak ere izan ziren, eztia nola ateratzen den ikusteko aukera izan zen, liztor asiatikoaren habiak ere ikusi zitezkeen eta herriko buruhandi eta erraldoiak herriko kaleetan ibili ziren herriko txistulariez lagunduta.

Recibe nuestras newsletters en tu email

Apúntate