Diario Vasco

Usurbil Futbol Taldeko jolakariak martxan

Jokoak. Frontoi atzean jolasean ibili ziren goizean txikienak.
Jokoak. Frontoi atzean jolasean ibili ziren goizean txikienak.
  • Zazpi talde ditu lehian taldeak eta duela urte batzuk hasitako bideari ere jarraitzen dio futbol eskolarekin

Usurbil Futbol Taldeak 2016-2017 denboraldian lehian dituen taldeen aurkezpena egin zuen igandean. Herriko pilotalekuko Jose Luis Zumetaren murala atzean zutela, denboraldi honetan herriko futbol taldeak dituen talde desberdinetako partaideak ikusteko aukera izan zen bertan.

Aurkezpenaren aurretik, goizeko 10:30ean hasita, haurrentzako jolasak izan ziren Mikel Laboa plaza inguruan. Futbol eskolako eta alebin eta infantil mailetako jokalariek joko desberdinetan parte hartzeko aukera izan zuten.

Eguerdiko 12:00ak alderako aurkezpenari hasiera emateko prest ziren Mikel Laboa plaza inguruan. Honela bada, futbol eskola, alebinak, infantilak, kadeteak, jubenilak, regionalak... jokalari ugari bildu ziren igandeko aurkezpenean. Izan ere, duela hilabete batzuk hasi zen denboraldian zazpi talde ditu lehian Usurbil F.T.k eta horrez gain, duela urte batzuk hasitako bideari jarraitzen diote futbol eskolarekin. Jokalariez gain, entrenatzaile eta zuzendaritza batzordeko kideak ere parte hartu zuten aurkezpen ekitaldi honetan. Banan bana taldeak muralaren aurretik pasa ziren taldearen argazkia ateratzeko eta bukaeran Usurbil Futbol Taldeko kideen 'familia' argazkia atera zuten.

Emaitzak

Asteburuko jardunaldiari dagokionez, 1. Erregional mailako taldeak garaipen garrantzitsua lortu zuen Haranen larunbatean. Asoleus taldea izan zuten aurrez aurre eta 3-2 irabazi zuten. Honenbestez, sailkapeneko 2. postuan kokatu dira. Partida honen ondoren 1. jubenil mailako taldeak Urnieta liderraren aurka jokatu zuen Haranen eta usurbildarrek garaipen bikaina lortu zuten. Azken partidetako bolada onarekin jarraitzen dute eta 4-2 irabazi ostean, sailkapeneko 3. postuan kokatu dira.

1. kadete mailako taldeak 6-0 galdu zuen Antigua Luberri A taldearen aurka eta infantil mutilek 1-4 Idiazabalen aurka. Infantil neskei dagokionez, Usurbil A taldeak 2-2 berdindu zuen Hernaniren aurka eta Usurbil B taldeak 3-0 galdu zuen Zarautzen.

Recibe nuestras newsletters en tu email

Apúntate