Diario Vasco

'Glencree' dokumentala ikusteko aukera izango da gaur kultur etxean

  • 'Konponbidean al goaz Orion?' jardunaldiaren baitan, 19:00etan

Udalak eta herritar talde batek antolatutako 'Konponbidean al goaz Orion?' jardunaldiaren baitan, zineforuma izango da gaur 19:00etan kultur etxean. 'Glencreen' dokumentala ikusi ahal izango da, Irlandako Adiskidetzeren eta Bakearen aldeko etxea dagoen hirian bildutako ETAren bost biktima eta GAL eta eskuin muturreko taldeen beste bost biktima dira protagonistak. Elkarren arteko zenbait topaketa egin ondoren, 2012ko udaberrian amaitu zuten prozesua eta, ondoren, jende aurrean agertu ziren aurreneko aldiz, bost urtetan ezkutuan bildu ondoren. Agerraldi hartan elkarrekin adostutako agiriaren berri eman zuten. Bertan, partekatuko bizipenak jaso zituzten, jasandako biolentzia guztia errotik bidegabea dela esanez.

Dokumentala Arabako Murua herrian eta Irlandako Glencree hirian grabatuta dago eta bost urteko prozesu horrek 2015ean Orioko Udalak gonbita egin zien herriko lagun batzuei, jatorri politikoko indarkeriak eragindako sufrimenduaz hitz egiteko. Udalak herritarrei egindako dei zabalari sei lagunek erantzun zioten eta horiek hainbat bilera egin dituzte dagoeneko, gaiaz aritzeko. Udaleko talde politikoek, beren aldetik, gaia landu dute elkarrekin eta egina dute bide bat, modu paraleloan.

Ibilbide horretan indarkeria politikoak eta terrorismoak gure eguneroko bizitzan eragin dituen ondorioetan zentratu dira eta parte hartzaileek beren bizipenak konpartitu dituzte, nork bere sufrimenduak azalduz eta besteenak entzunez. Esperientzia interesgarria izan da eta, orain, herriari zabaldu nahi diote eta jende gehiago gonbidatu parte hartzera.

Udalak uste du garrantzizkoa dela parte hartzea zabaltzea eta ahalik eta herritar gehien inplikatzea prozesu honetan. Horrela bakarrik lortu daiteke bizi izan dugun sufrimenduari hitzak jarri, elkarren minak eta arrazoiak entzun eta gogoeta konpartitu bat egitea.

Herritarren inplikazioa lortzeko ahalegin horretan, Udalak eta herritarren talde horrek, Bakeola zentroaren laguntzarekin, hiru ekitaldi antolatu ditu, 'Konponbidean al goaz Orion?' izenpean. Joan den astean zabaldu zen zikloa 'Mujeres en construcción' filmarekin eta gaurkoa bigarren ekitaldia izango da.

Recibe nuestras newsletters en tu email

Apúntate