Diario Vasco

Hondakin bilketa sistema aldaketaren aurrean akordioa aldarrikatu du herritar talde batek

Herriko udalbatza hondakinen inguruan eztabaidatzen.
Herriko udalbatza hondakinen inguruan eztabaidatzen. / K. A.
  • Bihar, 13:00etan Laranjadi plazan egingo den mosaikora deitzen dituzte herritarrak

Zestoako udalak gaur egun martxan dagoen «adostutako zabor bilketa sistema aldebakarretik aldatu nahi duela» eta, herritar talde batek «egungo sistemaren alde eta adostasunaren aldeko sinadura bilketa» egin zuen Zestoako herrian, 720 sinadura bilduz. Orain zenbait ideiez edo puntuz osatutako honako ida-tzia plazaratu nahi dute, «akordioaren alde».

«Herriko beste gaiekin alderatuta, hondakinen bilketa sistemaren aldaketa herri eragile eta herritarrekin kontatu gabe egitea erabaki du Zestoako Udalak. Ez gaude inolaz ere ados erabakitzeko moduarekin, herritarrok zeresan handia baitugu gai honen inguruan eta garrantzitsua baita gure iritzia kontutan hartzea», hasten dira esaten.

«Hau ez da Udaleko alderdien kontua bakarrik, herritarrok zuzenean ukitzen gaituen kontua da, eta are gehiago, orain artean gai honen inguruan herrian izan den dinamika parte-hartzailea kontutan har-tzen badugu: egun indarrean dugun sistema mahai baten bueltan landua izan da, eta ordezkari politikoez eta teknikoez gain norbanako eta eragile ezberdinek bertan beren ekarpenak egin eta guztion artean adostua», jarraitzen dute esaten.

«Herri helduen gisara jokatu dugu, alderdi politikoen desberdintasunak alde batera utzi eta akordioz egindako sistemak harro sentiarazten gaitu; eta hori balioan jartzeaz gain, berriro ere hala izan dadin lan egitea dagokigu bai herritarroi eta baita Udalari ere», adierazten dute.

«Edo bagara edo ez gara»

«'Zestoa Herri Hezitzailea' bezalako proiektuak garatzen ari garen honetan, haurrak ahaldundu eta erabakietan arduratsu parte har dezaten hezi nahi dituen herriak ezin diezaioke bizkarra eman hondakinen gaian herritarrari. Edo bagara edo ez gara. Orain arte emaitza onak eman dituen sistema dugu eta berau mantentzearen alde 720 herritarren sinadura bildu ditugu. Mankomunitatean kexa gutxien dituen sistema da gurea, adostua eta garbia. Dagoeneko ohituta gaude, eta hobetzeko aukera handiak eskaintzen ditu, gainera. Adostutako bilketa-sistema ezarri eta bi urtera akordioa sinatu zuen alderdi batek bere kabuz sistema aldatzea ez da ez bidezkoa eta ezta legitimoa ere. Gainera, erabaki honek ekonomikoki hurrengo hamarkadetarako hipotekatuko gaitu, aldaketa egiteak gastu handia suposatzen baitu. Zestoak beste zerbait merezi du, eta akordio zabalagoa behar da orain egin nahi dena egin ahal izateko. Lehendik datorren adostasuna apurtzeko arriskuaren aurrean akordioaren aldeko apustua egiten dugu guk, eman ditzagun pausuak bide horretan», argitzen dute», uste dute.

«Ezinbestekoa iruditzen zaigu gune zabal batean ordezkari politikoez gain herriko talde eta eragileak zein norbanakoak lehen bai lehen bildu eta gaia bertan lantzea. Gure jarrera positiboa eta eraikitzailea izango da gune horretan, eta akordioetara heltzeko asmoz ekarpena egiteko prestasuna agertu nahi dugu aldi berean», esplikatzen du herri taldeak.

«Gure jarrera egungo sistema mantentzearen aldekoa izanik ere, aldaketarik bada adostua izan behar duela diogu. Horretarako, emaitza eta bermeen inguruan hausnarketa zuhurra egin eta konpromiso zehatzak hartu behar dira; bestela ez baitu ezertarako balioko ez erabakiak eta ezta orain arte egindako bide luze eta oparoak ere. Lehen mailako gaia da guretzat esku artean duguna, garrantzi handikoa. Orain artean aurreratu duguna ezin utz dezakegu galtzen; ez gaude atzera egiteko prest. Ingurumenarekin arduratuta gaudelako eta etorkizun hobe bat nahi dugulako ahalik eta sistema eraginkorrena adostu behar dugu guregatik eta datozen belaunaldiengatik. Bide honetan bidelagun izango gaituzue», amaitzen dute esaten.

Futbola

Bihar hamaika partida izango ditugu lehian Iraetako zelaian, izan ere infantil B (Zumaian jokatuko dute) eta kadete nesken taldeak (Arrasaten) ezik beste guziek bertan jokatuko baitute.

Talde nagusiak, esaterako, 16:00etan jokatuko du Eibarren aurka, eta segidan jubenilak arituko dira Aloña Mendiren kontra. Goizean aldiz infantil mutilak, 10:00etan, infantil neskak, 11:00etan eta kadete mutilak, 11:45etan arituko dira.

Recibe nuestras newsletters en tu email

Apúntate