Diario Vasco

'Goazen kalera' ekimena martxan jartzera doaz

Herri lanak. Azken asteetan herri lan desberdinak egin ditu udalak, besteak beste bideen asfaltatzeak.
Herri lanak. Azken asteetan herri lan desberdinak egin ditu udalak, besteak beste bideen asfaltatzeak.

Herriko nagusienen edota dibertsitate funtzionala duten usurbildarren osasuna zaindu asmoz, Usurbilgo Udalak, beste eragile ba-tzuekin batera, 'Goazen Kalera' ekimena martxan jarri du. Ekimen horren bitartez, herritik zehar joango diren ibilbide ezberdinak planteatuko dira, ohitura osasuntsuak bultzatuz. Horretarako, asteazkenero, 11:00etan, Artzabalen izango dute hitzordua partehartzaileek.

Lehen ibilaldia urriaren 19rako iragarri dute antolatzaileek, eta 2017ko ekainean bukatuko da. Nahiz eta edonork duen ibilaldi horietan parte hartzeko aukera, bereziki adineko pertsonentzat eta dibertsitate funtzionala duten pertsonentzat bideratu da ekimena. Horretarako, herrigunetik lau ibilbide zehaztu dituzte antolatzaileek, eta astero bat egingo dute. Horrez gain, asteazkenero ibilbideak egiten dituzten heinean, zigilu batekin partehartzaileen txartel propioak markatuko dira, eta aldizka 'Hurbilago' merkatari eta ostalari elkartearen eskutik sorpresatxoak egongo dira.

Herriko eragileen laguntza

Astero, ibilbidea bukatu ondoren, mokadutxo bat jateko aukera egongo da Artzabalen bertan. Eguraldi txarra eginez gero, partehartzaileak Artzabalen bertan geratuko dira, gorputza eta osasuna zaintzeko ariketak eginez.

Ekimenak babes zabala jaso du eragile zein erakundeen aldetik. Usurbilgo Udalaz gain, Hurbilago merkatari eta ostalari elkarteak, Eusko Jaurlaritzak eta Osakidetzak parte hartu dute. Horrez gain, Gure elkarteak, Gure Pakea eta Arrate jubilatu elkarteak, DYAk, Udarregi ikastolak, Lanbide hastapenak edota odol emaileek ere laguntza baliogarria eskaini dute.

Bestalde, zenbait hirigintza lan burutu ditu udalak azken asteetan. Hala nola, Donostiako bidea, Burnigurutze ingurua, Txantxon ingurua eta Urdaira-Tellegindegi bideen konponketa eta asfaltatzea aurrera eraman dute, Mahaspildeko aparkalekuan dagoen arketa ere berritu egin da, Etxealdiako dantza taldekoen lokalaren eraberritu dute; Egiluze, Urkamendi eta Haraneko ur matxuren konponketa ere eginda eta haizeak puskatutako Zumarte Musika Eskolako kanaloiaren eraberritzea ere egin dute.

Usurbilgo txanpona

Gaur eta ostegunean, herriko saltokietan herriko txanponarekin erosketa egin ahal izateko baliagarri diren Usurbilgo txanponak eskuratzeko aukera izango da. Nafarroako Rural Kutxaren bulegoan eskuratu ahal izango dira gaur 12:00etatik 14:00etara eta ostegunean Potxoenean 18:00etatik 20:00etara. Bezero bakoitzak gehienez 5 txanpon eskuratu ahal izango ditu. Gogoratu behar da, udalak eta Hurbilagok martxan jarri zuten egitasmo honen bidez, Usurbilgo txanponarekin ordainduta %10 merkeago egin daitezkeela erosketak.

Recibe nuestras newsletters en tu email

Apúntate