Diario Vasco

Festa giroa nagusi berriz ere Aginagan

Herri kirolak. San Praixku egunez, asteartean, aginagarrek lehia bizia izan zuten frontoian.
Herri kirolak. San Praixku egunez, asteartean, aginagarrek lehia bizia izan zuten frontoian. / NOAUA!
  • Gaur umeen eguna izango dute, besteak beste, jolas, bazkari eta puzgarriekin

Aginagako San Praixku jaiak aurrera doaz. Pasa den ostegunetik festa giroan dira eta hainbat ekitaldiren ostean azken asteburuari helduko diote gaurtik larunbatera bitartean. Asteartean izan zuten egun handia, San Praixku eguna, eta asteguna izanda ere festa giro polita izan zen goiz eta arratsaldez. Goizean jubilatuen hamaiketakoa izan zen bertsolari eta guzti eta arratsaldean aginagarren arteko herri kirolak, sagardo dastaketa eta patata tortilla lehiaketa egin zituzten besteak beste.

Atzo, berriz, Gazte afaria izan zuten gaueko 21:00etan eta 24:00etan kontzertuak eliza zaharrean. Kezka, Odolaren Mintzoa eta Zaparra taldeak izango ziren bertan.

Gaur umeen eguna izango dute. Haurren jolasak izango dira goizeko 10:00etan hasita eta bazkaria izango dute 13:00etan. Arratsaldean puzgarrietan jolasteko aukera izango dute. Jarraian txokolate banaketa eta buruhandiak ere izango dira. Musikak ere bere lekutxoa izango du. 19:00etan hasita MartxanGO taldearen eskutik gazte eta heldu dantzan jartzeko saioa izango da. 21:00etan, berriz, bertso afaria eliza zaharrean Andoni Egaña eta Sebastian Lizasorekin. Ondoren, Oharkabe taldearen eskutik dantzaldia eliza zaharrean goizaldeko 1:00ak aldera eta karaokea ere iragarri dute.

Larunbatean ere ekimen ugari antolatu ditu Aginagako jai batzordeak. XXXV. mus txapelketa herrikoia egingo dute 16:00etan. Izen ematea 15:30etatik 16:00etara egiteko aukera izango da. Bikotekideetako batek aginagarra izan beharko du txapelketan parte hartu ahal izateko. 18:00etan Gorriti bertan izango da eta 19:00etan poteoa egingo dute elektrotxarangarekin. 24:00etan Gozategi taldea entzuteko aukera izango da frontoian, ondoren Laiotz taldea izango delarik. Goizeko 4.00etan Aros DJ-a izango da eliza zaharrean.

Recibe nuestras newsletters en tu email

Apúntate