Diario Vasco

Etxeko partidetan nagusi herriko eskubaloi taldeak

Oiardon. Bertan jokatutako lau partidetan garaipenak izan ziren.
Oiardon. Bertan jokatutako lau partidetan garaipenak izan ziren.
  • Senior mailako biek garaipena lortu zuten eta kadete eta jubenil mailan lau norgehiagokatatik hiru irabazi zituzten

Usurbil Kirol Elkarteko eskubaloi taldeek emaitza onak lortu dituzte asteburu honetan. Oiardo kiroldegian jokatutako 4 partidetan, behintzat, garaipenak lortu zituzten. Kadete eta jubenil mailako nesken eta mutilen taldeek Euskal ligako 1. jardunaldia izan zituen jokoan. Nesken taldeek kiroldegian jokatu zituzten euren partidak Errotabarri taldearen aurka eta biek garaipena lortu zuten. Kadeteek jokatu zuten lehendabizi eta 19-17 irabazi zuten. Ondoren jubenil mailako taldearen tanda izan zen eta hauek errazago nagusitu ziren, 35-17.

Mutilen taldeek, berriz, Urdulizen jokatu zuten larunbatean eta emaitza desberdinak lortu zituzten. Kadete mailako taldeak garaipena lortu zuen, 25-33, baina jubenil mailako taldeak ezin izan punturik eskuratu, 33-28 galdu baitzuten.

1. Lehen Nazionaleko senior mailako gizonezkoen taldeak, berriz, ligako lehen garaipena eskuratu zuen larunbatean Oiardo kiroldegian. 2. jardunaldia izan zuten jokoan eta BM. Barakaldo taldearen aurka 21-20 irabazi zuten usurbildarrek.

Parekotasun eta emozio handiko neurketa izan zen. Hasieran kanpoko taldea 0-3 aurreratu bazen ere, 8. minuturako 4-4 berdinduta ziren eta hortik aurrera berdinketa ugari izan ziren, atsedenaldira Usurbil KE. 10-9 aurretik iristeko.

Bigarren zatian ere bide beretik joan zen partida 16. minutu aldera arte. Orduan Barakaldo 16-18 jarri zen aurretik eta usurbildarrek bi jokalari gutxiagoz jokatu behar izan zituzten hurrengo minutuak, baina hala ere partidari buelta ematea lortu zuten. Azkenean 21-20 irabazi zuten.

Zilarrezko Ohorezko mailan jokatzen ari den senior emakumezkoen taldeak, berriz, sendo jarraitzen du liga hasiera honetan. Igandean jokatu zuten ligako 3. partida eta hirugarren garaipena eskuratu zuten Eharialdea taldearen aurka 29-25 irabazi ostean.

Markagailuak bestelakorik badio ere emozio handiko neurketa izan zen. Lehen zatiko azken minutuetara arte berdinketa ugari izan ziren, baina atsedenaldira iritsi aurreko azken minutuetan usurbildarrek partidako alderik handiena lortu zuten, 15-12 iritsiaz atsedenaldira.

Bigarren zatiaren hasieran, berriz, Usurbil Kirol Elkarteak norgehiagoka erabakita utzi zezakeela zirudien, 17-13 eta 19-14 aurretik izan baitziren, baina Eharialdeak ez zuen etsi, eta aldea gol bakar batera murriztea lortu zuten 10. minutuan, 19-18. Hala ere, herriko emakumezkoen taldeak sufritzen badakiela erakutsi zuen eta berriz ere aldea handitzen hasi zen pixkanaka pixkanaka. Azkenean 29-24 irabaziaz.

Honenbestez, sailkapeneko buruan jarraitzen dute Logroño Sporting La Rioja eta Aiala Zarautz taldeekin batera jokatutako 3 neurketak irabazita.

Usurbil Futbol Taldea

Usurbil Futbol Taldeko 1. Erregional mailako taldeak ligako lehen garaipena eskuratu zuen pasa den larunbatean Donostiako Herrera futbol zelaian Asoleus taldearen aurka. Usurbildarrek 1 eta 3 irabazi zuten eta pixkanaka maila berriari neurria hartzen hasiak direla dirudi lehen jardunaldian galdu ostean , azken 2 partidetan 4 puntu eskuratu baitituzte.

Ezin berdina esan 1. jubenil mailako taldearengandik. 3 jardunaldi jokatu ostean puntu bakarrarekin dira sailkapenean. Ostiralean jokatu zuten 3. jardunaldiko neurketa eta markagailuan aurretik joan arren, 4-2 galdu zuten Urnietaren aurka.

Azkenik, 1. kadete mailako taldeak 1-2 galdu zuen Antigua-Luberri taldearen aurka Harane futbol zelaian.

Recibe nuestras newsletters en tu email

Apúntate