Diario Vasco
Arantxa, Beñaten ama eta Ramon Martija, A.M.Keko lehendakaria, laguntza  emateko unean.
Arantxa, Beñaten ama eta Ramon Martija, A.M.Keko lehendakaria, laguntza emateko unean. / K.A.

15 urte Pumori mendiko ezbeharra gertatu zela

  • Beste urtebetez senide eta lagunek bidaia egingo dute Pumori mendiko kanpamendu basera

Atzo bertan gertatu izan bazen bezala izango dute-dugu presente herritar askok orain 15 urte Nepaleko Pumori mendian gertatu zen istripua. 2001eko urriaren 17an gertatu zen ezbehar hau. 15 urte pasa dira jada Beñat Arrue aizarnarra eta Iñaki Aiertza Aizarnazabaleko semea bertan hil zirela, beste hiru mendizale nafarrekin batera, mendi istripu larria tarteko.

Mendi espedizio hartan beste bi zestoar ere baziren, eta zoriona zein negarra elkar lagun izan ziren berriak iristen hasi ziren heinean, batzuk hil zirela eta besteak aldiz zortez onik zirela jakin genuenean.

Geroztik hainbat bidaia egin izan dituzte inguru hartara hauen senide eta lagunek. Aizarnatik, esate baterako, bataz beste hiru urtetik behin egiten dute bidai hau, eta orain ere bertara joatekoak dira Beñaten gurasoak eta Aizarna eta Zumaiako hainbat lagun, urriak 3an zehatzago esanda. Bidaia Pumori mendiko kanpamendu basera egiten dute, eta bitartez nolabait laguntza ematen saiatzen dira Nepaleko inguru behartsu hartara.

Oraingoan, besteak beste, Zestoako Mendi klubak 1.000 euro eman dizkie Beñaten gurasoei, Nepalen orain urtebete gertatu zen lurrikararen ondorio larriak nolabait arintzen saiatu daitezen.

Ibilaldi neurtua

Aizarna eta mendiko berriekin jarraituz, jakin azaroak 13an, igandea, Beñat-Benantxio ibilaldi neurtua ospatuko dela, Aizarnako paraje ederrean.

Mendiko bi istripu ezberdinetan hil ziren (Beñat 2001ean Pumorin eta Benantxio 2013an, Aneton) herriko bi mendizale handi hauen izena daraman mendi proba hau Aizarnako herri elkartea, Agiro Mendi klubak eta Zestoako Udalak bultzatzen dute. Izen ematea herrikrosa web gunean egin daiteke (10 euro) edo proba egunean bertan ere bai, (15 euro).

Irteera ordua 7:30etik 8etara izango da, Aizarnako plazatik, eta honako ibilbidea prestatu dute: Aizarna - Benita benta - Gazume - Iturriotz - Altzola - San Pelaio - Aizarna (25km).

Parte hartzen dutenei opari bat emango zaie, jateko eta edatekoa egongo da ibilbidean zehar eta ordua kontrolatzeko guneak ere bai.

Bukaeran bazkaria egongo da Aizarnan bertan, eta mendi probarako izena ematerakoan bazkarirako ere eman ahal izango da.

Recibe nuestras newsletters en tu email

Apúntate