Diario Vasco

Eskubaloi partidak gaur eta bihar kiroldegian

Lidertzan. 1. postuan mantentzen saiatuko da senior mailako taldea.
Lidertzan. 1. postuan mantentzen saiatuko da senior mailako taldea.
  • Harane futbol zelaian, berriz, 1. kadete mailako taldeak jokatuko du gaur goizeko 11:00etan

Asteburu honetan eskubaloi partida ugari ikusteko aukera izango da Oiardo kiroldegian. Senior mailako 2 taldeak liga hasia dute jada, baina asteburu honetan kadete eta jubenil mailako neska nahiz mutilen taldeak ere lehian hasiko dira. Gaur goizeko 10:30ean infantil nesken lagunarteko partida jokatuko da eta bertan herriko bi taldeak izango dira aurrez aurre.

Arratsaldean, berriz, kadete eta jubenil mailako nesken txanda izango da. Lehen jardunaldi honetan Ermuako Errotabarri taldearen aurka jokatuko dute bi taldeek, 15:45ean kadeteek eta 17:30ean jubenilek.

Gaur Oiardo kiroldegian jokatuko den azken neurketa, berriz, senior mutilen 1. Nazional mailako taldeak 19:30ean jokatuko duena izango da. C.B. Barakaldo taldea izango dute aurrez aurre 2. jardunaldian.

Pasa den larunbatean Errenterian jokatutako lehenengo jardunaldian 25-21 galdu zuten Ereintzaren aurka. Parekotasuna izan zen nagusi partida hasieratik. Berdinketak eta gol bakarreko abantailak izan ziren eta 13-12ko markagailuarekin iritsi ziren atsedenaldira. Bigarren zatia ere ildo berdinetik joan zen eta partida amaitzeko 8 minutu falta zirenean 21-20 ziren markagailuan, baina azken minutu hauetan Ereintzak partida bereganatzea lortu zuen. Gaur aurrez aurre izango duten taldeak, berriz, 25-27 galdu zuen Elgoibarren aurka.

Bihar ere eskubaloiaz gozatzeko aukera izango da kiroldegian. 10:00etan infantil mutilen lagunarteko neurketa jokatuko da herriko bi taldeen artean. 12:00etan, berriz, 2 jardunaldiren ostean Zilarrezko Ohorezko mailan lidertzan kokatuta dagoen emakumezkoen senior mailako taldeak jokatuko du Garlan Legumbres Eharialdea taldearen aurka.

Herriko taldeak orain arte jokatutako bi partidak irabazi ditu, azken pasa den asteburuan Barañainen Lagunak taldearen aurka. 22-26 nagusitu ziren. Eharialdeak, aldiz, orain arte jokatutako bi neurketak galdu ditu. Bi talde hauek igoera fasea jokatu zuten duela 2 urte Oiardon eta orduan 30-29 irabazi zuten gasteiztarrek. Kadete eta jubenil mutilen taldeek etxetik kanpo jokatuko dute gaur arratsaldean, Urdulizen hain zuzen ere. Kadeteek 18:00etan eta jubenilek 19:30etan.

Futbola

Bestalde, Usurbil Futbol Taldeko 1. kadete mailako taldeak Haranen jokatuko du gaur 11:00etan. Antigua Luberri A taldea izango dute aurkaria herriko jokalariek. Usurbildarrek etxetik kanpo 4-4 berdindu zuten pasa den asteburuan Añorgaren aurka.

1. Erregional mailako taldeak, berriz, Herrera futbol zelaian jokatuko du arratsaldeko 17:30ean hasita Asoleus taldearen aurka. Usurbil Futbol Taldeak 1-1 berdindu zuen larunbatean Vasconiaren aurka Haranen.

Recibe nuestras newsletters en tu email

Apúntate