Diario Vasco

Urriaren 8a arte San Praixku jaiak Aginagan

Umeen eguna. Urriaren 7an, ostirala, haurrek puzgarrietan ibiltzeko aukera izango dute frontoian.
Umeen eguna. Urriaren 7an, ostirala, haurrek puzgarrietan ibiltzeko aukera izango dute frontoian.
  • Bihar pilota txapelketako finala jokatuko da eta datozen egunetarako egitaraua potoloa da

Datozen bi asteetan jai giroa izango da nagusi Aginagan. San Praixkuak iritsi dira eta ohikoa den bezala 2 asteburutan hainbat ekin-tzaz gozatzeko aukera izango da. Atzo izan zen jaietako lehen ekimena, XIV. Gizonezkoen pala txapelketako finala jokatu baitzen atzo, eta datozen egunetarako egitarau potoloa osatu dute.

Gaur gauean pilota partidak izango dira Hariztitxo pilotalekuan. Gazteen esku pilota partida izango da lehendabizi 22:00etan hasiko den jaialdian eta ondoren, Aginagako XIV. Pilota txapelketako finala jokatuko da. Santxo usurbildarrak eta Aranguren aginagar gazteak Arrieta eta Altunaren aurka jokatuko dute.

Bihar, berriz, oilasko biltzaileen eguna izango dute. Goizeko 5:30ean oilaskoko biltzaileen gosaria iragarri dute eta 6:00etan irtengo dira baserriz baserri oilaskoak biltzera. 12:00etan Aginagako haurrak eta animatzen direnak oilasko biltzaileekin batuko dira Mapilen eta 14.30etan oilasko biltzaileek bazkaria izango dute Sekañan.

Arratsaldeko ekimenei dagokionez, 17:00etan haurrentzako Ixabel Agirresarobe ipuin kontalaria izango da ludotekan eta 18:00etan buruhandiak irtengo dira kalera. 21:00etan herri afaria iragarrita dago. Txartelak aurrez erosi behar dira Aitzaga tabernan edota Aginagako Arrate egoitzan. Helduek 20 euro ordaindu behar dituzte eta haurrek 12. Goizaldeko 1:00etatik aurrera Erokomeri taldearekin dantzaldia izango da frontoian eta 4:00etan Gurru DJ-a eliza zaharrean.

Igandean, goizeko 9:00etan tiro platoa izango da Aginagan eta 19:00etan sardina eta sagardo banaketa herriko plazan trikitilariek girotuta. XXXIV. Toka txapelketa ere egingo dute egunean zehar.

Asteartean, urriaren 4an, San Praixku eguna ospatuko dute. Goizeko 11:00etan meza nagusia izango da eta ondoren herriko jubilatuei hamaiketakoa eskainiko zaie Aginaga Sagardotegian bertsolari eta guzti. Arratsaldeko 18:00etan herri kirolak izango dira eta 18:30ean sagardo desberdinen dastaketa eta piper jana, trikitilariez alaituta. Bitartean, buruhandiak ere irtengo dira. 19:30erako patata tortilla lehiaketa iragarrita dago eta pintxo-potea egingo dute 20:00etan.

Ostegunetik larunbata bitartean ere ekimen ugari izango dira. Ostegunean gazte afaria izango dute 21:00etan eta 24:00etan kontzertuak eliza zaharrean. Kezka, Odolaren Mintzoa eta Zaparra taldeak izango bertan.

Ostiralean, berriz, umeen eguna izango dute. Haurren jolasak izango dira goizeko 10:00etan hasita eta bazkaria izango dute 13:00etan. Arratsaldean puzgarrietan jolasteko aukera izango dute. Jarraian txokolate banaketa eta buruhandiak ere izango dira. Musikak ere bere lekutxoa izango du gaur. 19:00etan hasita MartxanGO taldearen eskutik gazte eta heldu dantzan jartzeko saioa izango da. 21:00etan, berriz, bertso afaria eliza zaharrean Andoni Egaña eta Sebastian Lizasorekin. Ondoren, Oharkabe taldearen eskutik dantza egiteko aukera ezin hobea izango da eliza zaharrean goizaldeko 1:00ak aldera eta karaokea ere iragarri dute.

Larunbatean ere ekimen ugari antolatu ditu Aginagako jai batzordeak. XXXV. mus txapelketa herrikoia egingo dute 16:00etan, izen ematea 15:30etik 16:00etara egiteko aukera izango delarik. Bikotekideetako batek aginagarra izan beharko du txapelketan parte hartu ahal izateko. 18:00etan Gorriti bertan izango da eta 19:00etan poteoa egingo dute elektrotxarangarekin. 24:00etan Gozategi taldea entzuteko aukera izango da frontoian, ondoren Laiotz taldea izango delarik. Goizeko 4:00etan Aros DJ-a izango da eliza zaharrean.

Bestalde, urriaren 1ean, 4an, 7an eta 8an Aginagako jubilatuen eskulanak ikusgai izango dira apaiz etxean.

Recibe nuestras newsletters en tu email

Apúntate