Diario Vasco

Gaur emango zaie hasiera Samiel jaiei arratsaldeko txupinazoarekin Aizarnazabalen

Arratsaldeko 19:00etan emango zaie ofizialki hasiera aurtengo Samielei txupinazo antzeztuarekin eta ondoren buruhandiak izango dira. Mariatxiak egongo dira plazan 20:00-21:30etara bitartean eta gaueko 23:00etatik 02:00etara berbena Luhartz taldearekin.

Gaztetxeko kideek aurten ahalegin berezia egin dute eta jai hauetarako ekitaldi ugari prestatu dituzte, lehengo astean hasita, eta gaur 18:00etatik aurrera txosnen irekiera izango dute.

Bihar egun handia da herritarrentzat eta goizeko 10:00etan izango da diana herriko txistulariekin. Eguerdiko mezetan, goizeko 11:00etan, hamabi urtez Saiatz ibarreko bikarioa izan den Jabier Zubizarretari agurra emango zaio jubilatu egin baita eta aldi berean, ongi etorria Oñatiko Mikel Biain Saiatz ibarreko bikario berriari. Meza ondoren, XXXII. Sagardo Lehiaketa eta txorizo dastaketa eta herritarren arteko bolo txapelketa izango dira. Arratsalde partean, 16:30ean Aizarnazabalgo VI. Gazteen eskuzko pilota finalak jokatuko dira eta 17:00etan berriz, bingoa.

Bingo ostean, VIII. Joxe Larrarte memorialaren finalak jokatuko dira eta arratseko 19:30etik 21:00etara eta gaueko 22:00etatik 00:00etara berriro, erromeri alaia Naiara eta Jugatzekin.