Diario Vasco

Bizipozaren aldarria!

Pirritx, Porrotx eta Marimotots. Herriko frontoian eskaini zuten emanaldian jende ugari bildu zen.
Pirritx, Porrotx eta Marimotots. Herriko frontoian eskaini zuten emanaldian jende ugari bildu zen.
  • Euskara, auzolana, elkartasuna eta bizipozaren aldarria sendoa izan zen igandean Usurbilen

Bizipozak hartu zuen Usurbil igandean. Behar bereziak dituzten haurrei eta euren familiei elkartasuna adierazteko aukera paregabea izan zen Irrien Lagunak Gizartegintza elkarteak antolatutako egun osoko jaian.

Azken finean, Bizipoza elkartea osatzen duten 30 elkarte desberdinen jarduera zein den ezagutzeko aukera izan zen goizean zehar. Askatasuna plazan kokatu zituzten euren postu edota tailerrak, eta Bizipozaren jai honetara gerturatu zirenek bertatik bertara jaso ahal izan zuten gizarte errealitate ezberdinen berri.

Baita haurrek ere. Frontoitik Askatasuna plazara, Askatasuna plazatik frontoira, hara eta hona ibili ziren Piko-piko jolasaren bidez eta Irrien Lagunen pertsonaia desberdinek emandako pistei jarraituz, proba desberdinak egin zituzten postu hauetan.

Pirritx, Porrotx eta Marimototsek beraien ikuskizunarekin hasi aurretik elkarte, babesle edota laguntzaileei harrera egin zitzaien frontoiko oholtzan eta Kilometroak 15 ekimenean jai inklusiboen alde egindako lana eskertu nahi izan zuten, horretan lanean aritu zen lan taldeko bi kideri oroigarri bat emanaz. Ondoren, haur nahiz gurasoek 'Amalur' ikuskizunaz gozatzeko aukera izan zuten.

Arratsaldean ere jai giroa izan zen nagusi Usurbilen. Kantari, dantzari, magia eginaz oholtzan izan ziren elkarte desberdinetako kideak eta Ane eta piratek ere giro ezin hobea jarri zuten Bizipozako elkarteekin batera. Amaitzeko txokolatea jateko aukera ere izan zuten Usurbila gerturatu zirenek.