Diario Vasco

Katukale irakurle taldea datorren astean abian jarriko da eta izena eman daiteke

Irakurle taldea udal liburutegian elkartzen da hilabeteko azken ostegunetan liburuaz mintzatzera.
Irakurle taldea udal liburutegian elkartzen da hilabeteko azken ostegunetan liburuaz mintzatzera.

Katukale Irakurketa-Taldean izena emateko epea zabalik dago eta datorren astean hasiko dira literatur zaleak elkartu eta liburuak aztertzen. Dinamizatzailea azken urteetan izan den bezala Uxoa Alberdi izango da. Lehen saioa datorren astean izango da hilak 27an, asteartea.

Funtzionamendua oso erraza da. Hilabete bakoitzean liburu bat proposatzen da eta egun batean irakurle denak saio berezi batean elkartzen dira irakurritakoaren inguruan hitz egiteko. Baina bi hilabetetik behin, saio horretan idazle gonbidatuak egoten dira eta denen artean mintzagai izaten dute liburua.

Lehen saioa

Astearte honetan, hilak 27an, bere lehen literatur solasaldia burutuko du Katukale, Getariako irakurle taldeak. Ramon Saizarbitoriaren 'Lili eta Biok' izango dute mintzagai ikasturtea abiatzeko. Oraindik ere garaiz zabiltzate solasaldietan parte hartzeko. Konpainia onean, euskal literatura ezagutu, gozatu eta aztertu nahi baduzu, edo besterik gabe, euskaraz irakurri nahi baduzu aukera ezin hobea da. Uxue Alberdi eta beste solaskideak hileko azken ostegunean elkartzen dira arratsaldeko 18:30ean Getariako udal liburutegian. Izena emateko Udaleko weborrinan bilatuko dute bete beharreko orria eta ondoren emailez (kultura@getaria.org) edo zuzenean udal bulegoetara eraman daiteke. Urrian Katixa Agirreren 'Atertu arte itxaron' liburua irakurri eta aztertuko dute katukale zaleak.