Diario Vasco

Biharko pilota partidekin hasiko dira aurtengo Samiel aurreko ekitaldiak

Larunbatean paella herrikoia bazkal orduan.
Larunbatean paella herrikoia bazkal orduan.
  • Larunbateko bertso jaialdia Atari Soro pilotalekuan izango da

Lehengo larunbatean ardi txakur lehiaketa izan bagenuen, oraingo asteburuan ere ekitaldi bereziak izango dira Samiel jaien aurrekari gisa. Ostiral gauean, 22:00etatik aurrera VIII. Joxe Larrarte memorialaren finalaurrekoak jokatuko dira; sub22 mailan, Alberdi- Aranguren, Salaberria-Zezeagaren aurka eta senior mailan berriz, Peña-Erasun, Labaka-Uzkudunen aurka.

Bazkari herrikoia

Larunbatean, berriz, euskal jai eguna ospatuz, goizeko 10:30ean ttuntturrak izango dira herriko kaleetan zehar eta eguerdiko 12:00etan, Memorialaren finalaurrekoak jarraituko dute sub22an Zubizarreta-Galmendia, Egiguren-Aizpururen aurka eta senior mailan berriz, Errandonea-Martinez, Etxaniz-Murgiondoren aurka.

Paella herrikoia izango da arratsaldeko 14:00etan eskola aurrean eta bazkal ostean, muxikoak. Arratsaldeko 19:00etan, herri kirol jaialdia, Euskadiko lasto jasotze txapelketarekin.

Gaueko 22:30ean bertso jaialdia izango da Atari-Soro frontoian. Parte hartuko duten bertsolariak lehen mailakoak izango dira: Andoni Egaña, Amets Arzalluz, Maialen Lujanbio eta Iker Zubeldia; gaijartze lanetan Amaia Agirre arituko da eta bertso ekitaldiaren ondoren, berbena egongo da Bide Batez taldearekin.