Diario Vasco

Aginagako XIV. pilota txapelketako azken laurdenak jokatuko dira gaur Hariztitxon

Aginagako XIV. pilota txapelketa azken partidetan da dagoeneko. San Praixku jaiak gero eta gertuago daude eta ohikoa den bezala, jaien egitarauaren barruan izango da finala, irailaren 29an hain zuzen ere. Gaueko 22:00etan hasiko da azken jaialdi hau eta finalaren aurretik beste pilota partida bat ere ikusi ahal izango da Aginagako pilotalekuan.

Abuztuaren amaieran ekin zioten lehiari aurten txapelketan parte hartu duten 20 bikoteek eta dagoeneko final laurdenetan dira. Atzo jokatu ziren lehendabiziko 2 final laurdenak eta gaur arratsaldeko 20:00etan hasita jokatuko dira beste biak. Arrieta eta Altunak Maiz eta Esnaolaren aurka jokatuko dute lehendabizi. Bigarren final laurdenean, berriz, Santxo usurbildarrak eta Aranguren agingar gazteak Urbieta I eta Iruretagoiena izango dituzte aurrez aurre Aginagako Hariztitxo pilotalekuan.

Enrique Abril txapelketa

Bestalde, jokoan da Enrique Abril Errebote txapelketa ere. Gipuzkoako Behar Zana, Txost eta Zubieta, eta Lapurdiko Endaiarrak, Kanboarrak, Luzean, Noizbait eta Senpere dira aurtengo txapelketan nor baino nor arituko diren taldeak eta azken urteetan ohikoa den bezala, partidak Oiartzungo, Villabonako eta Zubietako plazetan izango dira ikusgai.

Txapelketa bi fasetan antolatu da. 1. fasean, parte-hartzaileek, bi multzotan banaturik, itzuli bateko ligaxka jokatuko dute denek denen aurka. 2. fasean, bi finalerdi jokatuko dituzte, 1. faseko ligaxkan multzo bakoitzeko aurreneko bi postuetan sailkatutako taldeak gurutzatuz. Finalerdi bat Villabonan izango da eta bestea Zubietan eta final handia, berriz, Oiartzungo plazan.

Iazko edizioan Zubietako taldea finalera iritsi zen, baina azkenean ezin izan zuten garaipena lortu Donibane Lohizuneko Luzean taldearen aurka.