Diario Vasco

Kontxako banderen auzia aztertzeko komisioa sortu berri da herrian

Agerraldia. Kontxako bigarren jardunaldiaren bezperan agerraldia egin zuten.
Agerraldia. Kontxako bigarren jardunaldiaren bezperan agerraldia egin zuten.
  • Herritarrekin bilera egingo da ostegunean, 19:00etan Salatxon

1939ko banderaren auzia aztertzeko komisioa sortu da eta herritarrekin bilera egingo du irailaren 22an, osteguna. Beraz, propio sortutako lan taldeak landuko du 1939. urteko banderaren auzia. Komisio honek eskertzen du Donostiako alkateak gaia konpontzeko erakutsitako prestutasuna. Bilera eskatu dio, idatziz, Eneko Goiari. Ostegunean, hilaren 22rako, oriotarrak deitu ditu komisioak, herritarrek izan dezaketen informazioa eta iritzia jaso eta ikerketan baliatzeko.

Kontxa bezperan agerraldia egin zuten Orioko alkateak, 30 arraunlari oriotarrek eta Orio Arraunketa Elkarteko lehendakari izandakoek 1939. urtean arraunlari oriotarrek uretan irabazi zutena defendatzeko. Donostiako Festak erakundeak erabili duen prozedura salatu zuten eta erabakia orain hartzeko arrazoiak zein diren galdetu.

Ordutik ez da lana eten. Gaia lan-tzeko propio sortu da 1939ko Banderaren Auzia Aztertzeko komisioa deitu dutena. Agerraldian esan bezala, arrazoiz kargatu nahi da. Gaiak denbora, pulamentua, ikerketa, analisia eta azterketa eskatzen ditu.

Komisioak eskertzen ditu Eneko Goia Donostiako alkatearen prestutasuna eta borondatea. Donostiako alkateak bilera egiteko borondatea erakutsi zuen igandean eta komisioak ez du aukera galdu nahi. Bilera eguna eta ordua jarri zain daude komisioko kideak. Hiru taldekidek ordezkatuko dute Orioko herria bilera horretan.

Herritarrei deialdia

Herri bilera deitu du komisioak, Salatxo aretoan izango da datorren ostegun honetan, arratsaldeko zazpietan. Helburua epe laburrean emango diren pausoen berri eman eta herritarrak hizketan jartzea da. Komisioko kideak seguru daude 1939. urteko banderaz informazio asko izango dutela oriotarrek.

Garai hartako oriotarrek bandera horren bueltan kontatutakoa ez dago idatziz jasoa eta ikerketarako baliatu nahi dute. Horrez gain, herritarren sentimendua eta iritzia ere dokumentatu nahi du komisioak. Datuak behar bezala jasotzeko saiakera egingo da herri bileran.

Gaur azken estropada

Bitartean, Orio Arraunketa Elkarteko lehen traineruak, Ligako azken estropada du gaur eguerdian, Portugaleteko El Corte Ingles Saria.

Aste honetan bertan jakin da Joxean Olaskoaga 'Aizperro' datorren denboraldian ez dela Orioko lehen traineruaren entrenatzailea izango. Bera eta zuzendaritza akordio batera iritsi dira konpromesua eteteko. Ez legoke gaizki gaurko estropadarekin, amaiera polit bat ematea denboraldiari eta aurtengo 'Aizperroren' ibilbideari Oriorekin. Oraindik ez da zabaldu, baina laister jakinaraziko du zuzendaritza taldeak entrenatzaile berriaren izena.