Diario Vasco
'Balenciaga, parpailaren bidez'.
'Balenciaga, parpailaren bidez'. / MICHELENA

Jardunaldi berezia antolatu da Museoan datorren larunbaterako

  • Jardunaldi honen bidez, bukaera emango diote 'Balenciaga, parpailaren bidez' erakusketari

Irailaren 17an, datorren larunbatean, bi gaien inguruko gogoeta egingo dute Getariako museoan: Balenciagaren ehungintzaren unibertsoari buruzkoa eta modaren esparruan material berrien erabileran dauden azken joerei buruzkoa. Nazioarteko bi aditu arituko dira horretan, Catherine Join-Diéterle eta Micol Costi.

Cristobal Balenciagak oso ondo ezagutzen zituen ehunak. Jakintza sakon horri esker, ehunen ezaugarri teknikoak kontuan hartu, eta egokienak aukeratzen zituen, ahalik eta ekarpen estetiko eta funtzional handienak egiteko. Horregatik, eta horretarako, sarritan aritzen zen bere sorkariak gauzatzeko ehun berriak eta erabilera berriak aztertzen. Hala egin zuen, adibidez, parpailarekin. Horren erakusle da 'Balenciaga, parpailaren bidez' erakusketa. Moda-sortzaileak oso gogoko zuen parpaila, eta inork ez bezalako arreta eskaini zion: berreskuratu, berregokitu eta berrinterpretatu egin zuen, eta ohorezko lekua egin zion moda garaikidearen esparruan.

30.000 bisitaritik gora

Martxoaren 18an inauguratutako erakusketa, 30.000 bisitari baino gehiago izan dituena, hori ixteko modua izango da jardunaldia, eta bi ikuspegi landuko dituzte bertan. Batetik, ikuspegi historikoa, Cristobal Balenciagak egindako ekarpenak aztertzeko. Catherine Join-Diéterle mintzatuko da horri buruz, Ondarearen kontserbatzailea, Galliera Museoko zuzendari ohia, eta 'Balenciaga, parpailaren bidez' erakusketaren komisarioa. Bestetik, egungo ikuspegia jorratuko dute, modaren munduan gaur egun dauden eta etorkizun hurbilean egongo diren material berrien ekoizpenaz eta erabileraz egindako ikerketak eta hautemandako joerak ezagutzeko. Micol Costi arituko da horretaz, Material ConneXion kontsultoretzako Library & Material Research arloko zuzendaria.

Museoko atarian izango da jardunaldia, 11:00-13:30 bitartean, eta, ondoren, erakusketa bisitatzeko aukera emango dute. Jardunaldira sartzea eta erakusketa bisitatzea dohainik da. Lekua mugatua denez, aurrez izena eman behar da, mezu bat bidaliz info@cristobalbalenciagamuseoa.com helbide elektronikora, edota telefono-zenbaki honetara hots eginez: 943.00.88.40. Jardunaldiak Donostia Sustapeneko Donostia Moda Klusterraren kolaborazioa jaso du.