Diario Vasco

Karela Festa larunbatean errefuxiatuen alde

Josune Gorostidi (Hotz Zarautz), Onintza Arregi (BXPXport), eta La Caixako Aitor eta Ainara.
Josune Gorostidi (Hotz Zarautz), Onintza Arregi (BXPXport), eta La Caixako Aitor eta Ainara. / ETXEBERRIA
  • Hotz Zarautz elkartera bideratuko dute dirua, Europako ekialdean egoera larria bizi duten errefuxiatuei laguntzeko

Larunbat honetan, irailaren 17an, Karela Festa antolatu du kiroldegiko kudeatzaileak, BPXport enpresak. Iaz antolatu zen lehen aldiz festa hau, eta bildutako dirua Juneren Hegoak elkartearentzat izan zen. Aurten Hotz Zarautz elkartera bideratuko dute festan bildutako dirua, eta Europako ekialdean egoera larria bizi duten errefuxiatuei laguntza emateko erabiliko da. Honen aurkezpena atzo eguerdian egin zuten Karelan bertan, Josune Gorostidi (Hotz Zarautz elkarteko kideak), Onintza Arregi (BPXport), eta Orioko La Caixako Aitor Hoyos eta Ainarak.

Dirua biltzeko, iaz bezala, haurrei eta helduei zuzendutako jarduerak antolatu dituzte larunbaterako. Festa arratsaldez egingo da, 15:00etan hasita. Antolatuko diren jardueretan parte hartzeko, izena eman behar da aldez aurretik Karela kiroldegian bertan.

Festaren programa

Festa larunbat arratsaldean izango da, 15:00etatik 20:00etara. Hasteko, 15:00etatik 16:00etara, Indoor Triatloia haur eta helduentzat (dena kiroldegi barruan: lehendabizi spining bizikletetan 2 kilometro; ergometroan arrauna kilometro bat, eta amaitzeko, zintan korrika, kilometro eta 200 metro). Partaideek 3 euro ordaindu beharko dituzte.

Arratsalde guztian, 15:30etik 19:00etara, haurrentzat jarduerak: uretako puzgarriak igerilekuan, eskalada rokodromoan eta eskulanak. Sarrerek 3 euro balio dute.

Era berean, 17:00etatik 17:30era, haurrei zuzendutako Jump Kids saioa; 17:30etik 19:00etara, helduentzat saioak: 30 minutuko spining saioak eta 30 minutuko jump saioa. Ondoren, amaitzeko, 19:00etatik 19:45era bitartean, helduentzat jump-spining saioa. Biak batera egingo dituzte. 5 euroko prezioa izango du saioak.

Zozketa solidarioa

Festarekin lotuta, zozketa solidario bat ere antolatu dute. Euro baten truke eros daiteke boletoa, eta herriko denda eta kirol klub ezagunen opariak zozkatuko dituzte. Boletoak Orioko Karela kiroldegian eta Zarauzko Aritzbatalde kiroldegian daude salgai, eta zozketa irailaren 17an bertan egingo dute, 19:00etan, Karela kiroldegian.

Festaren antolatzailea, esanda bezala, BPXport enpresa da. Babesleak, berriz, CaixaBank, Orioko Udala eta KaleFit dira. Laguntzaileak, bestalde, hauek dira: Orioko Eroski Center, Itziar kirolak, Zipristin inprimategia, Izarra etxetresnak, Kepa Loidi harategia, Anarri opariak eta Zarauzko Udala.

Atzoko aurkezpenean esan zuten bezala, «ekintza solidarioa honen helburua ahalik eta jende gehienen parte hartzea lortzea da: Orio, Aia, Agina, Usurbil, Zarautz, Getaria eta abarretako jendea, eta festa giroan errefuxiatuentzat ahal den diru gehien lortzea».