Diario Vasco

Nerea Arrien lekeitiarrak irabazi du XXXIV. Lizardi Saria

Lizardi Saria. Nerea Arrien da aurtengo Lizardi Sariaren irabazlea 'Pentsatzeko txokoa' lanarekin.
Lizardi Saria. Nerea Arrien da aurtengo Lizardi Sariaren irabazlea 'Pentsatzeko txokoa' lanarekin.
  • Hamalau lan aurkeztu dira aurtengo lehiaketara eta epaimahaiaren aburuz 'Pentsatzeko txokoa' izan da onena

Nerea Arrien Elordi (Lekeitio, 1976) gailendu da aurten Zarauzko Udalak antolatzen duen Lizardi Sarian. Hamalau lan aurkeztu dira aurtengo lehiaketara, eta Nerearena nabarmendu du Yolanda Arrietak, Alexander Gurrutxagak eta Miren Agur Meabek osatutako epaimahaiak. Bigarren urtez jarraian, beraz, bizkaitar batek eskuratu du Lizardi Saria: iaz Alaine Agirre bermeotarrak eskuratu zuen 'Hau ez da zoo bat!' lanarekin.

Sari gisa 3.700 euro jasoko ditu Nerea Arrienek eta bere lana argitaratu egingo da. Ohi bezala, Zarauzko ikastetxeetan doan banatuko ditu liburuaren 2.500 ale Zarauzko Kultura Sailak. Argitalpena sari banaketa egunean kaleratuko da, 2016ko apirilean.

'Pentsatzeko txokoa' izeneko narrazioak, «errealismo berrien ildotik, gaur egungo familia-egitura eta harremanak islatzen ditu eta, ezin hobeto, eskola eta eskola giroa», adierazi du epaimahaiak. Izenburuari jarraituz eraikitako fikzio-lanak «pentsatzeari egiten dio gorazarre, modu ironiko eta dinamikoan, Deba neskatoaren bitartez. Debaren begiradak erakusten digu nolakoa den eskola eta bertako giroa; nolakoak diren irakasleak eta neskatoaren lagunak; zer gertatzen den gela barruan eta zer eratakoak diren ikasle-irakasle arteko harremanak. Neskatoaren ikuspegitik ezagutuko ditugu bere gurasoak ere, haien gustuak, ideiak, ohiturak, maniak eta lanak, bikote-harremana eta alabarekiko jokabidea», gaineratu dute. «Modu dosifikatuan ematen zaigu informazio guztia, pertsonaien akzioen bidez, esaldi laburrekin eta erritmo bizian, zatika osaturiko egitura ondo josian eta irakurlearen arreta pizteko jokoez lagunduta».

Ez da irabazten duen lehen saria. Honela, 2011 urtean Saint Jordi topalekuko kontakizun laburren lehenengo saria jaso zuen 'Hiria eta olatua' ipuinarekin. Sariketako kontakizunak '100 arrazoi Donostia maitatzeko' liburuan bilduta daude. 2013an ere saritua izan zen 'Bi bala' testuarekin. Geroago kolaborazioak egin ditu aldizkari ezberdinetan.