Beste lau proposamen aurtengo Kulturaldia ixteko

Bihar, berriz, bertso afaria izango da Artzabal jatetxean, 21:00etan. Asier Azpiroz zubietarra eta Ane Labaka lasartearra izango dira afalostean bertsotan jardungo direnak eta Iñaki Agirresarobe 'Tola' izango da gai jartzailea. Menua hau izango da: aperitiboa, entsalada epela, entrekota patatekin, azkenburukoa, edaria eta kafea. Txartelak 18 eurotan daude salgai Bordatxon, Artzabalen, Lizardin eta Noaua!ko egoitzan.

Hurrengo egunean, larunbatean, antzerkiak hartuko du Kulturaldiaren lekukoa. Dejavu Panpin Laborategiaren 'Arrastoak' antzezlana ikusteko aukera izango da Sutegi eraikineko auditorioan 20:00etatik aurrera. Antzezlan honek Donostiako Udaleko euskara zerbitzuak eta Donostia Kulturak antolatzen duten XV. Donostia Antzerki Saria eskuratu zuen otsailean. Sarrerak ohiko lekuetan egongo dira salgai aldez aurretik 8 eurotan(Noaua!ko bazkideek 6).

Azkenik, aurtengo Kulturaldiari amaiera emateko, herriko ondarea ezagutzeko ibilaldia proposatzen dute. Igandean, 10:00etan abiatuta Arratzain eta Aginaga arteko ibilbidea egingo da Jakoba Errekondo paisajistarekin. Arratzainera igotzeko autobus zerbitzua izango da, 9:30ean Bordatxo paretik. Arratzainera oinez joan nahi duenak 10:00etarako egon beharko du Arratzainen.

Bestalde, azaroaren 9az geroztik eta larunbata bitartean, Usurbilen bizi den Joseba Larratxe irundarraren 'Lauki' erakusketa izango da ikusgai herriko Sutegi udal liburutegian.