Irteera berezia antolatu dute elkar lanean Zestoako Agiro, Azpeitiko Lagun Onak eta Nabarralde taldeek

Benetan irteera interesgarria antolatu dute elkar lanean eskualdeko Nabarraldek (Nafarroako historiaz aritzen den taldea), Zestoako Agiro Mendi Taldeak, Arabar Errioxako Ttiki Ttaka Elkartea eta Azpeitiko Lagun Onak taldeak, hurrengo iganderako, uztailak 5.

'Sonsierra ezagutuz' irteera honetan denetarik izango da, mendi irteeratxoa, bertako historia ezagutu, upeltegiak eta gastronomia, umeentzako igerilekuak, txokolatada... Igandean, goizeko 8:00etan Gurutzetik irten, Azpeititik 8:15ean, eta Sonsierrara joko dute. Han Ttiki Ttakako lagunekin elkartu eta Sonsierratik Bastidara joango dira oinez . «Sonsierrak historian eta gaur arte izan duen garrantziaz jabetuko gara Ttiki Ttakakoek emandako azalpenak tarteko», diote.